Read the Bible

¹ Quando sederis, ut comedas cum principe, diligenter attende, quae apposita sunt ante faciem tuam, ² et statue cultrum in gutture tuo, si avidus es. ³ Ne desideres de cibis eius, quia est panis mendacii.

⁴ Noli laborare, ut diteris, sed in prudentia tua acquiesce. ⁵ Si erigas oculos tuos ad opes, iam non sunt; quia facient sibi pennas quasi aquilae et volabunt in caelum.

⁶ Ne comedas cum homine invido et ne desideres cibos eius; ⁷ quoniam sicut aestimavit in animo suo, ita ipse est. "Comede et bibe" dicet tibi, et mens eius non est tecum. ⁸ Buccellam, quam comederas, evomes et perdes pulchros sermones tuos.

⁹ In auribus insipientium ne loquaris, quia despicient doctrinam eloquii tui.

¹⁰ Ne attingas terminos viduae et agrum pupillorum ne introeas: ¹¹ redemptor enim illorum fortis est, et ipse iudicabit contra te causam illorum.

¹² Introduc ad doctrinam cor tuum et aures tuas ad verba scientiae. ¹³ Noli subtrahere a puero disciplinam; si enim percusseris eum virga, non morietur: ¹⁴ tu virga percuties eum et animam eius de inferno liberabis. ¹⁵ Fili mi, si sapiens fuerit cor tuum, gaudebit tecum et cor meum, ¹⁶ et exsultabunt renes mei, cum locuta fuerint rectum labia tua.

¹⁷ Non aemuletur cor tuum peccatores, sed in timore Domini esto tota die, ¹⁸ quia est tibi posteritas, et praestolatio tua non auferetur.

¹⁹ Audi, fili mi, et esto sapiens et dirige in via animum tuum. ²⁰ Noli esse in conviviis potatorum nec in comissationibus carnis, ²¹ quia vacantes potibus et comissatores consumentur, et vestietur pannis dormitatio. ²² Audi patrem tuum, qui genuit te, et ne contemnas, cum senuerit mater tua. ²³ Veritatem eme et noli vendere; sapientiam eme et doctrinam et intellegentiam. ²⁴ Exsultat gaudio pater iusti; qui sapientem genuit, laetabitur in eo; ²⁵ gaudeat pater tuus et mater tua, et exsultet, quae genuit te. ²⁶ Praebe, fili mi, cor tuum mihi, et oculi tui vias meas custodiant. ²⁷ Fovea enim profunda est meretrix, et puteus angustus aliena, ²⁸ nam insidiatur ipsa in via quasi latro et iniquos in hominibus addet.

²⁹ Cui "Vae"? Cui "Eheu"? Cui rixae? Cui querela? Cui sine causa vulnera? Cui suffusio oculorum? ³⁰ His, qui commorantur in vino et eunt, ut scrutentur mixtum. ³¹ Ne intuearis vinum, quando flavescit, cum splenduerit in calice color eius: ingreditur blande, ³² sed in novissimo mordebit ut coluber et sicut regulus vulnerat. ³³ Oculi tui videbunt extranea, et cor tuum loquetur perversa; ³⁴ et eris sicut dormiens in medio mari et quasi sopitus ad malum navis: ³⁵ "Verberaverunt me, sed non dolui, percusserunt me, et ego non sensi; quando evigilabo et rursus illud requiram?".