Read the Bible

¹ Fili mi, si susceperis sermones meos et mandata mea absconderis penes te, ² intendens ad sapientiam aurem tuam, inclinans cor tuum ad cognoscendam prudentiam; ³ si enim sapientiam invocaveris et dederis vocem tuam prudentiae, ⁴ si quaesieris eam quasi pecuniam et sicut thesauros conquisieris illam, ⁵ tunc intelleges timorem Domini et scientiam Dei invenies. ⁶ Quia Dominus dat sapientiam, et ex ore eius scientia et prudentia. ⁷ Thesaurizabit rectis sollertiam et clipeus erit gradientibus simpliciter ⁸ servans semitas iustitiae et vias sanctorum custodiens. ⁹ Tunc intelleges iustitiam et iudicium et aequitatem et omnem semitam bonam,

¹⁰ quia intrabit sapientia cor tuum, et scientia animae tuae placebit. ¹¹ Consilium custodiet te, et prudentia servabit te, ¹² ut eruaris a via mala et ab homine, qui perversa loquitur; ¹³ qui relinquunt iter rectum, ut ambulent per vias tenebrosas; ¹⁴ qui laetantur, cum malefecerint, et exsultant in rebus pessimis: ¹⁵ quorum viae perversae sunt, et pravi gressus eorum. ¹⁶ Ut eruaris a muliere aliena et ab extranea, quae mollit sermones suos ¹⁷ et relinquit ducem pubertatis suae et pacti Dei sui oblita est. ¹⁸ Inclinata est enim ad mortem domus eius, et ad inferos semitae ipsius; ¹⁹ omnes, qui ingrediuntur ad eam, non revertentur nec apprehendent semitas vitae. ²⁰ Ut ambules in via bonorum et calles iustorum custodias: ²¹ qui enim recti sunt, habitabunt in terra, et simplices permanebunt in ea; ²² impii vero de terra perdentur, et, qui inique agunt, auferentur ex ea.