Read the Bible

¹ Mensis etiam septimi prima die conventus sanctus erit vo bis; omne opus servile non facietis in ea, quia dies clangoris est et tubarum. ² Offeretisque holocaustum in odorem suavissimum Domino: vitulum de armento unum, arietem unum et agnos anniculos immaculatos septem; ³ et in oblationibus eorum similae oleo conspersae tres decimas per vitulum, duas decimas per arietem, ⁴ unam decimam per agnum, qui simul sunt agni septem; ⁵ et hircum pro peccato, qui offertur in expiationem vestram, ⁶ praeter holocaustum calendarum cum oblatione et holocaustum sempiternum cum oblatione et libationibus solitis in odorem suavissimum, sacrificium ignis Domino. ⁷ Decima quoque die mensis huius septimi erit vobis conventus sanctus, et affligetis animas vestras; omne opus servile non facietis. ⁸ Offeretisque holocaustum Domino in odorem suavissimum: vitulum de armento unum, arietem unum, agnos anniculos immaculatos septem; ⁹ et in oblatione eorum similae oleo conspersae tres decimas per vitulum, duas decimas per arietem, ¹⁰ decimam unam per agnos singulos, qui sunt simul septem agni; ¹¹ et hircum pro peccato, absque his, quae offerri pro delicto solent in expiationem et holocaustum sempiternum cum oblatione et libaminibus eorum.

¹² Quinta decima vero die mensis septimi conventus sanctus erit; omne opus servile non facietis in ea, sed celebrabitis sollemnitatem Domino septem diebus ¹³ offeretisque holocaustum in odorem suavissimum Domino: vitulos de armento tredecim, arietes duos, agnos anniculos immaculatos quattuordecim; ¹⁴ et in oblatione eorum similae oleo conspersae tres decimas per vitulos singulos, qui sunt simul vituli tredecim, et duas decimas arieti uno, id est simul arietibus duobus, ¹⁵ et decimam unam agnis singulis, qui sunt simul agni quattuordecim; ¹⁶ et hircum pro peccato absque holocausto sempiterno et oblatione et libamine eius. ¹⁷ In die altero offeretis vitulos de armento duodecim, arietes duos, agnos anniculos immaculatos quattuordecim; ¹⁸ oblationemque et libamina singulorum per vitulos et arietes et agnos iuxta numerum eorum rite celebrabitis, ¹⁹ et hircum pro peccato absque holocausto sempiterno oblationeque et libamine eorum. ²⁰ Die tertio offeretis vitulos undecim, arietes duos, agnos anniculos imma culatos quattuordecim, ²¹ oblationem et libamina singulorum per vitulos et arietes et agnos iuxta numerum eorum rite celebrabitis, ²² et hircum pro peccato absque holocausto sempiterno oblationeque et libamine eius. ²³ Die quarto offeretis vitulos decem, arietes duos, agnos anniculos immaculatos quattuordecim, ²⁴ oblationem et libamina singulorum per vitulos et arietes et agnos iuxta numerum eorum rite celebrabitis, ²⁵ et hircum pro peccato absque holocausto sempiterno, oblatione eius et libamine. ²⁶ Die quinto offeretis vitulos novem, arietes duos, agnos anniculos immaculatos quattuordecim, ²⁷ oblationem et libamina singulorum per vitulos et arietes et agnos iuxta numerum eorum rite celebrabitis, ²⁸ et hircum pro peccato absque holocausto sempiterno, oblatione eius et libamine. ²⁹ Die sexto offeretis vitulos octo, arietes duos, agnos anniculos immaculatos quattuordecim, ³⁰ oblationem et libamina singulorum per vitulos et arietes et agnos iuxta numerum eorum rite celebrabitis, ³¹ et hircum pro peccato absque holocausto sempiterno, oblatione eius et libamine. ³² Die septimo offeretis vitulos septem et arietes duos, agnos anniculos immaculatos quattuordecim, ³³ oblationem et libamina singulorum per vitulos et arietes et agnos iuxta numerum eorum rite celebrabitis, ³⁴ et hircum pro peccato absque holocausto sempiterno, oblatione eius et libamine. ³⁵ Die octavo erit conventus sollemnis, omne opus servile non facietis ³⁶ offerentes holocaustum in odorem suavissimum Domino: vitulum unum, arietem unum, agnos anniculos immaculatos septem, ³⁷ oblationem et libamina singulorum per vitulum et arietem et agnos iuxta numerum eorum rite celebrabitis, ³⁸ et hircum pro peccato absque holocausto sempiterno, oblatione eius et libamine. ³⁹ Haec offeretis Domino in sollemnitatibus vestris, praeter vota et oblationes spontaneas in holocaustis, in oblationibus, in libaminibus et in hostiis pacificis". ⁴⁰ [30:1] Narravitque Moyses filiis Israel omnia, quae ei Dominus imperarat,