Read the Bible

¹ [2:2] Ascendit, qui dispergat, contra te. "Custodi munitionem, contemplare viam, conforta lumbos, robora virtutem valde". ² [2:3] Quia restituet Dominus magnificentiam Iacob sicut magnificentiam Israel, quia praedones praedati sunt eos et propagines eorum corruperunt. ³ [2:4] Clipeus fortium eius ruber, viri exercitus in coccineis; ignitae laminae ferreae curruum, quando praeparat bellum, et equites agitantur. ⁴ [2:5] In viis furibundae currunt quadrigae, invicem colliduntur in plateis; aspectus eorum quasi lampades, quasi fulgura discurrentia. ⁵ [2:6] Recordatur fortium suorum, ruunt in itineribus suis; currunt ad murum, et praeparatur umbraculum. ⁶ [2:7] Portae fluviorum apertae sunt, palatium tremit. ⁷ [2:8] Et speciosa denudatur, tollitur, et ancillae eius gemunt ut columbae et percutiunt corda sua. ⁸ [2:9] Et Nineve quasi piscina aquarum, cuius aquae fugiunt. "State, state!"; sed non est qui revertatur. ⁹ [2:10] "Diripite argentum, diripite aurum!". Et non est finis divitiarum; thesaurus ex omnibus vasis desiderabilibus. ¹⁰ [2:11] Dissipata et vastata et dilacerata, et cor tabescens, et dissolutio geniculorum; et tremor in cunctis renibus, et facies omnium eorum candentes.

¹¹ [2:12] Ubi est habitaculum leonum, et spelunca catulorum leonum, ad quam ivit leo, ut duceret illuc catulum leonis, et non erat qui exterreret? ¹² [2:13] Leo cepit sufficienter catulis suis et necavit leaenis suis; et implevit praeda speluncas suas et cubile suum rapina. ¹³ [2:14] "Ecce ego ad te, dicit Dominus exercituum, et succendam usque ad fumum quadrigas tuas; et leunculos tuos comedet gladius, et exterminabo de terra praedam tuam, et non audietur ultra vox nuntiorum tuorum".