Read the Bible

¹ Sero autem post sabbatum, cum illucesceret in primam sabbati, venit Maria Magdalene et altera Maria videre sepulcrum. ² Et ecce terrae motus factus est magnus: angelus enim Domini descendit de caelo et accedens revolvit lapidem et sedebat super eum. ³ Erat autem aspectus eius sicut fulgur, et vestimentum eius candidum sicut nix. ⁴ Prae timore autem eius exterriti sunt custodes et facti sunt velut mortui. ⁵ Respondens autem angelus dixit mulieribus: "Nolite timere vos! Scio enim quod Iesum, qui crucifixus est, quaeritis. ⁶ Non est hic: surrexit enim, sicut dixit. Venite, videte locum, ubi positus erat. ⁷ Et cito euntes dicite discipulis eius: "Surrexit a mortuis et ecce praecedit vos in Galilaeam; ibi eum videbitis". Ecce dixi vobis". ⁸ Et exeuntes cito de monumento cum timore et magno gaudio cucurrerunt nuntiare discipulis eius. ⁹ Et ecce Iesus occurrit illis dicens: "Avete". Illae autem accesserunt et tenuerunt pedes eius et adoraverunt eum. ¹⁰ Tunc ait illis Iesus: "Nolite timere; ite, nuntiate fratribus meis, ut eant in Galilaeam et ibi me videbunt".

¹¹ Quae cum abiissent, ecce quidam de custodia venerunt in civitatem et nuntiaverunt principibus sacerdotum omnia, quae facta fuerant. ¹² Et congregati cum senioribus, consilio accepto, pecuniam copiosam dederunt militibus ¹³ dicentes: "Dicite: "Discipuli eius nocte venerunt et furati sunt eum, nobis dormientibus". ¹⁴ Et si hoc auditum fuerit a praeside, nos suadebimus ei et securos vos faciemus". ¹⁵ At illi, accepta pecunia, fecerunt, sicut erant docti. Et divulgatum est verbum istud apud Iudaeos usque in hodiernum diem.

¹⁶ Undecim autem discipuli abierunt in Galilaeam, in montem ubi constituerat illis Iesus, ¹⁷ et videntes eum adoraverunt; quidam autem dubitaverunt. ¹⁸ Et accedens Iesus locutus est eis dicens: "Data est mihi omnis potestas in caelo et in terra. ¹⁹ Euntes ergo docete omnes gentes, baptizantes eos in nomine Patris et Filii et Spiritus Sancti, ²⁰ docentes eos servare omnia, quaecumque mandavi vobis. Et ecce ego vobiscum sum omnibus diebus usque ad consummationem saeculi".