Read the Bible

¹ Mane autem facto, consi lium inierunt omnes princi pes sacerdotum et seniores populi adversus Iesum, ut eum morti traderent. ² Et vinctum adduxerunt eum et tradiderunt Pilato praesidi. ³ Tunc videns Iudas, qui eum tradidit, quod damnatus esset, paenitentia ductus, rettulit triginta argenteos principibus sacerdotum et senioribus ⁴ dicens: "Peccavi tradens sanguinem innocentem". At illi dixerunt: "Quid ad nos? Tu videris!". ⁵ Et proiectis argenteis in templo, recessit et abiens laqueo se suspendit. ⁶ Principes autem sacerdotum, acceptis argenteis, dixerunt: "Non licet mittere eos in corbanam, quia pretium sanguinis est". ⁷ Consilio autem inito, emerunt ex illis agrum Figuli in sepulturam peregrinorum. ⁸ Propter hoc vocatus est ager ille ager Sanguinis usque in hodiernum diem. ⁹ Tunc impletum est quod dictum est per Ieremiam prophetam di centem: "Et acceperunt triginta argenteos, pretium appretiati quem appretiaverunt a filiis Israel, ¹⁰ et dederunt eos in agrum Figuli, sicut constituit mihi Dominus".

¹¹ Iesus autem stetit ante praesidem; et interrogavit eum praeses dicens: "Tu es Rex Iudaeorum?". Dixit autem Iesus: "Tu dicis". ¹² Et cum accusaretur a principibus sacerdotum et senioribus, nihil respondit. ¹³ Tunc dicit illi Pilatus: "Non audis quanta adversum te dicant testimonia?". ¹⁴ Et non respondit ei ad ullum verbum, ita ut miraretur praeses vehementer. ¹⁵ Per diem autem sollemnem consueverat praeses dimittere turbae unum vinctum, quem voluissent. ¹⁶ Habebant autem tunc vinctum insignem, qui dicebatur Barabbas. ¹⁷ Congregatis ergo illis dixit Pilatus: "Quem vultis dimittam vobis: Barabbam an Iesum, qui dicitur Christus?". ¹⁸ Sciebat enim quod per invidiam tradidissent eum. ¹⁹ Sedente autem illo pro tribunali, misit ad illum uxor eius dicens: "Nihil tibi et iusto illi. Multa enim passa sum hodie per visum propter eum". ²⁰ Principes autem sacerdotum et seniores persuaserunt turbis, ut peterent Barabbam, Iesum vero perderent. ²¹ Respondens autem praeses ait illis: "Quem vultis vobis de duobus dimittam?". At illi dixerunt: "Barabbam!". ²² Dicit illis Pilatus: "Quid igitur faciam de Iesu, qui dicitur Christus?". Dicunt omnes: "Crucifigatur!". ²³ Ait autem: "Quid enim mali fecit?". At illi magis clamabant dicentes: "Crucifigatur!". ²⁴ Videns autem Pilatus quia nihil proficeret, sed magis tumultus fieret, accepta aqua, lavit manus coram turba dicens: "Innocens ego sum a sanguine hoc; vos videritis!". ²⁵ Et respondens universus populus dixit: "Sanguis eius super nos et super filios nostros".

²⁶ Tunc dimisit illis Barabbam; Iesum autem flagellatum tradidit, ut crucifigeretur. ²⁷ Tunc milites praesidis suscipientes Iesum in praetorio congregaverunt ad eum universam cohortem. ²⁸ Et exuentes eum, clamydem coccineam circumdederunt ei ²⁹ et plectentes coronam de spinis posuerunt super caput eius et arundinem in dextera eius et, genu flexo ante eum, illudebant ei dicentes: "Ave, rex Iudaeorum!". ³⁰ Et exspuentes in eum acceperunt arundinem et percutiebant caput eius. ³¹ Et postquam illuserunt ei, exuerunt eum clamyde et induerunt eum vestimentis eius et duxerunt eum, ut crucifigerent. ³² Exeuntes autem invenerunt hominem Cyrenaeum nomine Simonem; hunc angariaverunt, ut tolleret crucem eius.

³³ Et venerunt in locum, qui dicitur Golgotha, quod est Calvariae locus, ³⁴ et dederunt ei vinum bibere cum felle mixtum; et cum gustasset, noluit bibere. ³⁵ Postquam autem crucifixerunt eum, diviserunt vestimenta eius sortem mittentes ³⁶ et sedentes servabant eum ibi. ³⁷ Et imposuerunt super caput eius causam ipsius scriptam: "Hic est Iesus Rex Iudaeorum". ³⁸ Tunc crucifiguntur cum eo duo latrones: unus a dextris, et unus a sinistris. ³⁹ Praetereuntes autem blasphemabant eum moventes capita sua ⁴⁰ et dicentes: "Qui destruis templum et in triduo illud reaedificas, salva temetipsum; si Filius Dei es, descende de cruce!". ⁴¹ Similiter et principes sacerdotum illudentes cum scribis et senioribus dicebant: ⁴² "Alios salvos fecit, seipsum non potest salvum facere. Rex Israel est; descendat nunc de cruce, et credemus in eum. ⁴³ Confidit in Deo; liberet nunc, si vult eum. Dixit enim: "Dei Filius sum"". ⁴⁴ Idipsum autem et latrones, qui crucifixi erant cum eo, improperabant ei. ⁴⁵ A sexta autem hora tenebrae factae sunt super universam terram usque ad horam nonam. ⁴⁶ Et circa horam nonam clamavit Iesus voce magna dicens: "Eli, Eli, lema sabacthani?", hoc est: "Deus meus, Deus meus, ut quid dereliquisti me?". ⁴⁷ Quidam autem ex illic stantibus audientes dicebant: "Eliam vocat iste". ⁴⁸ Et continuo currens unus ex eis acceptam spongiam implevit aceto et imposuit arundini et dabat ei bibere. ⁴⁹ Ceteri vero dicebant: "Sine, videamus an veniat Elias liberans eum".

⁵⁰ Iesus autem iterum clamans voce magna emisit spiritum. ⁵¹ Et ecce velum templi scissum est a summo usque deorsum in duas partes, et terra mota est, et petrae scissae sunt; ⁵² et monumenta aperta sunt, et multa corpora sanctorum, qui dormierant, surrexerunt ⁵³ et exeuntes de monumentis post resurrectionem eius venerunt in sanctam civitatem et apparuerunt multis. ⁵⁴ Centurio autem et, qui cum eo erant custodientes Iesum, viso terrae motu et his, quae fiebant, timuerunt valde dicentes: "Vere Dei Filius erat iste!". ⁵⁵ Erant autem ibi mulieres multae a longe aspicientes, quae secutae erant Iesum a Galilaea ministrantes ei; ⁵⁶ inter quas erat Maria Magdalene et Maria Iacobi et Ioseph mater et mater filiorum Zebedaei.

⁵⁷ Cum sero autem factum esset, venit homo dives ab Arimathaea nomine Ioseph, qui et ipse discipulus erat Iesu. ⁵⁸ Hic accessit ad Pilatum et petiit corpus Iesu. Tunc Pilatus iussit reddi. ⁵⁹ Et accepto corpore, Ioseph involvit illud in sindone munda ⁶⁰ et posuit illud in monumento suo novo, quod exciderat in petra, et advolvit saxum magnum ad ostium monumenti et abiit. ⁶¹ Erat autem ibi Maria Magdalene et altera Maria sedentes contra sepulcrum. ⁶² Altera autem die, quae est post Parascevem, convenerunt principes sacerdotum et pharisaei ad Pilatum ⁶³ dicentes: "Domine, recordati sumus quia seductor ille dixit adhuc vivens: "Post tres dies resurgam". ⁶⁴ Iube ergo custodiri sepulcrum usque in diem tertium, ne forte veniant discipuli eius et furentur eum et dicant plebi: "Surrexit a mortuis", et erit novissimus error peior priore". ⁶⁵ Ait illis Pilatus: "Habetis custodiam; ite, custodite, sicut scitis". ⁶⁶ Illi autem abeuntes munierunt sepulcrum, signantes lapidem, cum custodia.