Read the Bible

¹ Et introivit iterum in synago gam. Et erat ibi homo habens manum aridam; ² et observabant eum, si sabbatis curaret illum, ut accusarent eum. ³ Et ait homini habenti manum aridam: "Surge in medium". ⁴ Et dicit eis: "Licet sabbatis bene facere an male? Animam salvam facere an perdere?". At illi tacebant. ⁵ Et circumspiciens eos cum ira, contristatus super caecitate cordis eorum, dicit homini: "Extende manum". Et extendit, et restituta est manus eius. ⁶ Et exeuntes pharisaei statim cum herodianis consilium faciebant adversus eum quomodo eum perderent. ⁷ Et Iesus cum discipulis suis secessit ad mare. Et multa turba a Galilaea secuta est et a Iudaea ⁸ et ab Hierosolymis et ab Idumaea; et, qui trans Iordanem et circa Tyrum et Sidonem, multitudo magna, audientes, quae faciebat, venerunt ad eum. ⁹ Et dixit discipulis suis, ut navicula sibi praesto esset propter turbam, ne comprimerent eum. ¹⁰ Multos enim sanavit, ita ut irruerent in eum, ut illum tangerent, quotquot habebant plagas. ¹¹ Et spiritus immundi, cum illum videbant, procidebant ei et clamabant dicentes: "Tu es Filius Dei!". ¹² Et vehementer comminabatur eis, ne manifestarent illum.

¹³ Et ascendit in montem et vocat ad se, quos voluit ipse, et venerunt ad eum. ¹⁴ Et fecit Duodecim, ut essent cum illo, et ut mitteret eos praedicare ¹⁵ habentes potestatem eiciendi daemonia: ¹⁶ et imposuit Simoni nomen Petrum; ¹⁷ et Iacobum Zebedaei et Ioannem fratrem Iacobi, et imposuit eis nomina Boanerges, quod est Filii tonitrui; ¹⁸ et Andream et Philippum et Bartholomaeum et Matthaeum et Thomam et Iacobum Alphaei et Thaddaeum et Simonem Chananaeum ¹⁹ et Iudam Iscarioth, qui et tradidit illum. ²⁰ Et venit ad domum; et convenit iterum turba, ita ut non possent neque panem manducare. ²¹ Et cum audissent sui, exierunt tenere eum; dicebant enim: "In furorem versus est".

²² Et scribae, qui ab Hierosolymis descenderant, dicebant: "Beelzebul habet" et: "In principe daemonum eicit daemonia". ²³ Et convocatis eis, in parabolis dicebat illis: "Quomodo potest Satanas Satanam eicere? ²⁴ Et si regnum in se dividatur, non potest stare regnum illud; ²⁵ et si domus in semetipsam dispertiatur, non poterit domus illa stare. ²⁶ Et si Satanas consurrexit in semetipsum et dispertitus est, non potest stare, sed finem habet. ²⁷ Nemo autem potest in domum fortis ingressus vasa eius diripere, nisi prius fortem alliget; et tunc domum eius diripiet. ²⁸ Amen dico vobis: Omnia dimittentur filiis hominum peccata et blasphemiae, quibus blasphemaverint; ²⁹ qui autem blasphemaverit in Spiritum Sanctum, non habet remissionem in aeternum, sed reus est aeterni delicti". ³⁰ Quoniam dicebant: "Spiritum immundum habet".

³¹ Et venit mater eius et fratres eius, et foris stantes miserunt ad eum vocantes eum. ³² Et sedebat circa eum turba, et dicunt ei: "Ecce mater tua et fratres tui et sorores tuae foris quaerunt te". ³³ Et respondens eis ait: "Quae est mater mea et fratres mei?". ³⁴ Et circumspiciens eos, qui in circuitu eius sedebant, ait: "Ecce mater mea et fratres mei. ³⁵ Qui enim fecerit voluntatem Dei, hic frater meus et soror mea et mater est".