Read the Bible

¹ Et confestim mane consilium facientes summi sacerdotes cum senioribus et scribis, id est universum concilium, vincientes Iesum duxerunt et tradiderunt Pilato. ² Et interrogavit eum Pilatus: "Tu es rex Iudaeorum?". At ille respondens ait illi: "Tu dicis". ³ Et accusabant eum summi sacerdotes in multis. ⁴ Pilatus autem rursum interrogabat eum dicens: "Non respondes quidquam? Vide in quantis te accusant". ⁵ Iesus autem amplius nihil respondit, ita ut miraretur Pilatus. ⁶ Per diem autem festum dimittere solebat illis unum ex vinctis, quem peterent. ⁷ Erat autem qui dicebatur Barabbas, vinctus cum seditiosis, qui in seditione fecerant homicidium. ⁸ Et cum ascendisset turba, coepit rogare, sicut faciebat illis. ⁹ Pilatus autem respondit eis et dixit: "Vultis dimittam vobis regem Iudaeorum?". ¹⁰ Sciebat enim quod per invidiam tradidissent eum summi sacerdotes. ¹¹ Pontifices autem concitaverunt turbam, ut magis Barabbam dimitteret eis. ¹² Pilatus autem iterum respondens aiebat illis: "Quid ergo vultis faciam regi Iudaeorum?". ¹³ At illi iterum clamaverunt: "Crucifige eum!". ¹⁴ Pilatus vero dicebat eis: "Quid enim mali fecit?". At illi magis clamaverunt: "Crucifige eum!".

¹⁵ Pilatus autem, volens populo satisfacere, dimisit illis Barabbam et tradidit Iesum flagellis caesum, ut crucifigeretur. ¹⁶ Milites autem duxerunt eum intro in atrium, quod est praetorium, et convocant totam cohortem. ¹⁷ Et induunt eum purpuram et imponunt ei plectentes spineam coronam; ¹⁸ et coeperunt salutare eum: "Ave, rex Iudaeorum!", ¹⁹ et percutiebant caput eius arundine et conspuebant eum et ponentes genua adorabant eum. ²⁰ Et postquam illuserunt ei, exuerunt illum purpuram et induerunt eum vestimentis suis. Et educunt illum, ut crucifigerent eum. ²¹ Et angariant praetereuntem quempiam Simonem Cyrenaeum venientem de villa, patrem Alexandri et Rufi, ut tolleret crucem eius.

²² Et perducunt illum in Golgotha locum, quod est interpretatum Calvariae locus. ²³ Et dabant ei myrrhatum vinum; ille autem non accepit. ²⁴ Et crucifigunt eum et dividunt vestimenta eius, mittentes sortem super eis, quis quid tolleret. ²⁵ Erat autem hora tertia, et crucifixerunt eum. ²⁶ Et erat titulus causae eius inscriptus: "Rex Iudaeorum". ²⁷ Et cum eo crucifigunt duos latrones, unum a dextris et alium a sinistris eius. ²⁹ Et praetereuntes blasphemabant eum moventes capita sua et dicentes: "Vah, qui destruit templum et in tribus diebus aedificat; ³⁰ salvum fac temetipsum descendens de cruce!". ³¹ Similiter et summi sacerdotes ludentes ad alterutrum cum scribis dicebant: "Alios salvos fecit, seipsum non potest salvum facere. ³² Christus rex Israel descendat nunc de cruce, ut videamus et credamus". Etiam qui cum eo crucifixi erant, conviciabantur ei.

³³ Et, facta hora sexta, tenebrae factae sunt per totam terram usque in horam nonam. ³⁴ Et hora nona exclamavit Iesus voce magna: "Heloi, Heloi, lema sabacthani?", quod est interpretatum: "Deus meus, Deus meus, ut quid dereliquisti me?". ³⁵ Et quidam de circumstantibus audientes dicebant: "Ecce, Eliam vocat". ³⁶ Currens autem unus et implens spongiam aceto circumponensque calamo potum dabat ei dicens: "Sinite, videamus, si veniat Elias ad deponendum eum". ³⁷ Iesus autem, emissa voce magna, exspiravit. ³⁸ Et velum templi scissum est in duo a sursum usque deorsum. ³⁹ Videns autem centurio, qui ex adverso stabat, quia sic clamans exspirasset, ait: "Vere homo hic Filius Dei erat". ⁴⁰ Erant autem et mulieres de longe aspicientes, inter quas et Maria Magdalene et Maria Iacobi minoris et Iosetis mater et Salome, ⁴¹ quae, cum esset in Galilaea, sequebantur eum et ministrabant ei, et aliae multae, quae simul cum eo ascenderant Hierosolymam.

⁴² Et cum iam sero esset factum, quia erat Parasceve, quod est ante sabbatum, ⁴³ venit Ioseph ab Arimathaea nobilis decurio, qui et ipse erat exspectans regnum Dei, et audacter introivit ad Pilatum et petiit corpus Iesu. ⁴⁴ Pilatus autem miratus est si iam obisset, et, accersito centurione, interrogavit eum si iam mortuus esset, ⁴⁵ et, cum cognovisset a centurione, donavit corpus Ioseph. ⁴⁶ Is autem mercatus sindonem et deponens eum involvit sindone et posuit eum in monumento, quod erat excisum de petra, et advolvit lapidem ad ostium monumenti. ⁴⁷ Maria autem Magdalene et Maria Iosetis aspiciebant, ubi positus esset.