Read the Bible

¹ Prima autem sabbatorum, valde diluculo venerunt ad monumentum portantes, quae paraverant, aromata. ² Et invenerunt lapidem revolutum a monumento; ³ et ingressae non invenerunt corpus Domini Iesu. ⁴ Et factum est, dum mente haesitarent de isto, ecce duo viri steterunt secus illas in veste fulgenti. ⁵ Cum timerent autem et declinarent vultum in terram, dixerunt ad illas: "Quid quaeritis viventem cum mortuis? ⁶ Non est hic, sed surrexit. Recordamini qualiter locutus est vobis, cum adhuc in Galilaea esset, ⁷ dicens: "Oportet Filium hominis tradi in manus hominum peccatorum et crucifigi et die tertia resurgere"". ⁸ Et recordatae sunt verborum eius ⁹ et regressae a monumento nuntiaverunt haec omnia illis Undecim et ceteris omnibus. ¹⁰ Erat autem Maria Magdalene et Ioanna et Maria Iacobi; et ceterae cum eis dicebant ad apostolos haec. ¹¹ Et visa sunt ante illos sicut deliramentum verba ista, et non credebant illis. ¹² Petrus autem surgens cucurrit ad monumentum et procumbens videt linteamina sola; et rediit ad sua mirans, quod factum fuerat.

¹³ Et ecce duo ex illis ibant ipsa die in castellum, quod erat in spatio stadiorum sexaginta ab Ierusalem nomine Emmaus; ¹⁴ et ipsi loquebantur ad invicem de his omnibus, quae acciderant. ¹⁵ Et factum est, dum fabularentur et secum quaererent, et ipse Iesus appropinquans ibat cum illis; ¹⁶ oculi autem illorum tenebantur, ne eum agnoscerent. ¹⁷ Et ait ad illos: "Qui sunt hi sermones, quos confertis ad invicem ambulantes?". Et steterunt tristes. ¹⁸ Et respondens unus, cui nomen Cleopas, dixit ei: "Tu solus peregrinus es in Ierusalem et non cognovisti, quae facta sunt in illa his diebus?". ¹⁹ Quibus ille dixit: "Quae?". Et illi dixerunt ei: "De Iesu Nazareno, qui fuit vir propheta, potens in opere et sermone coram Deo et omni populo; ²⁰ et quomodo eum tradiderunt summi sacerdotes et principes nostri in damnationem mortis et crucifixerunt eum. ²¹ Nos autem sperabamus, quia ipse esset redempturus Israel; at nunc super haec omnia tertia dies hodie quod haec facta sunt. ²² Sed et mulieres quaedam ex nostris terruerunt nos, quae ante lucem fuerunt ad monumentum ²³ et, non invento corpore eius, venerunt dicentes se etiam visionem angelorum vidisse, qui dicunt eum vivere. ²⁴ Et abierunt quidam ex nostris ad monumentum et ita invenerunt, sicut mulieres dixerunt, ipsum vero non viderunt". ²⁵ Et ipse dixit ad eos: "O stulti et tardi corde ad credendum in omnibus, quae locuti sunt Prophetae! ²⁶ Nonne haec oportuit pati Christum et intrare in gloriam suam?". ²⁷ Et incipiens a Moyse et omnibus Prophetis interpretabatur illis in omnibus Scripturis, quae de ipso erant. ²⁸ Et appropinquaverunt castello, quo ibant, et ipse se finxit longius ire. ²⁹ Et coegerunt illum dicentes: "Mane nobiscum, quoniam advesperascit, et inclinata est iam dies". Et intravit, ut maneret cum illis. ³⁰ Et factum est, dum recumberet cum illis, accepit panem et benedixit ac fregit et porrigebat illis. ³¹ Et aperti sunt oculi eorum, et cognoverunt eum; et ipse evanuit ab eis. ³² Et dixerunt ad invicem: "Nonne cor nostrum ardens erat in nobis, dum loqueretur nobis in via et aperiret nobis Scripturas?". ³³ Et surgentes eadem hora regressi sunt in Ierusalem et invenerunt congregatos Undecim et eos, qui cum ipsis erant, ³⁴ dicentes: "Surrexit Dominus vere et apparuit Simoni". ³⁵ Et ipsi narrabant, quae gesta erant in via, et quomodo cognoverunt eum in fractione panis.

³⁶ Dum haec autem loquuntur, ipse stetit in medio eorum et dicit eis: "Pax vobis!". ³⁷ Conturbati vero et conterriti existimabant se spiritum videre. ³⁸ Et dixit eis: "Quid turbati estis, et quare cogitationes ascendunt in corda vestra? ³⁹ Videte manus meas et pedes meos, quia ipse ego sum! Palpate me et videte, quia spiritus carnem et ossa non habet, sicut me videtis habere". ⁴⁰ Et cum hoc dixisset, ostendit eis manus et pedes. ⁴¹ Adhuc autem illis non credentibus prae gaudio et mirantibus, dixit eis: "Habetis hic aliquid, quod manducetur?". ⁴² At illi obtulerunt ei partem piscis assi. ⁴³ Et sumens, coram eis manducavit. ⁴⁴ Et dixit ad eos: "Haec sunt verba, quae locutus sum ad vos, cum adhuc essem vobiscum, quoniam necesse est impleri omnia, quae scripta sunt in Lege Moysis et Prophetis et Psalmis de me". ⁴⁵ Tunc aperuit illis sensum, ut intellegerent Scripturas. ⁴⁶ Et dixit eis: "Sic scriptum est, Christum pati et resurgere a mortuis die tertia, ⁴⁷ et praedicari in nomine eius paenitentiam in remissionem peccatorum in omnes gentes, incipientibus ab Ierusalem. ⁴⁸ Vos estis testes horum. ⁴⁹ Et ecce ego mitto promissum Patris mei in vos; vos autem sedete in civitate, quoadusque induamini virtutem ex alto".

⁵⁰ Eduxit autem eos foras usque in Bethaniam et, elevatis manibus suis, benedixit eis. ⁵¹ Et factum est, dum benediceret illis, recessit ab eis et ferebatur in caelum. ⁵² Et ipsi adoraverunt eum et regressi sunt in Ierusalem cum gaudio magno ⁵³ et erant semper in templo benedicentes Deum.