Read the Bible

¹ In principio erat Verbum, et Verbum erat apud Deum, et Deus erat Verbum. ² Hoc erat in principio apud Deum. ³ Omnia per ipsum facta sunt, et sine ipso factum est nihil, quod factum est; ⁴ in ipso vita erat, et vita erat lux hominum,

⁵ et lux in tenebris lucet, et tenebrae eam non comprehenderunt. ⁶ Fuit homo missus a Deo, cui nomen erat Ioannes; ⁷ hic venit in testimonium, ut testimonium perhiberet de lumine, ut omnes crederent per illum. ⁸ Non erat ille lux, sed ut testimonium perhiberet de lumine. ⁹ Erat lux vera, quae illuminat omnem hominem, veniens in mundum. ¹⁰ In mundo erat, et mundus per ipsum factus est, et mundus eum non cognovit. ¹¹ In propria venit, et sui eum non receperunt. ¹² Quotquot autem acceperunt eum, dedit eis potestatem filios Dei fieri, his, qui credunt in nomine eius, ¹³ qui non ex sanguinibus neque ex voluntate carnis neque ex voluntate viri, sed ex Deo nati sunt. ¹⁴ Et Verbum caro factum est et habitavit in nobis; et vidimus gloriam eius, gloriam quasi Unigeniti a Patre, plenum gratiae et veritatis.

¹⁵ Ioannes testimonium perhibet de ipso et clamat dicens: "Hic erat, quem dixi: Qui post me venturus est, ante me factus est, quia prior me erat". ¹⁶ Et de plenitudine eius nos omnes accepimus, et gratiam pro gratia; ¹⁷ quia lex per Moysen data est, gratia et veritas per Iesum Christum facta est. ¹⁸ Deum nemo vidit umquam; unigenitus Deus, qui est in sinum Patris, ipse enarravit.

¹⁹ Et hoc est testimonium Ioannis, quando miserunt ad eum Iudaei ab Hierosolymis sacerdotes et Levitas, ut interrogarent eum: "Tu quis es?". ²⁰ Et confessus est et non negavit; et confessus est: "Non sum ego Christus". ²¹ Et interrogaverunt eum: "Quid ergo? Elias es tu?". Et dicit: "Non sum". "Propheta es tu?". Et respondit: "Non". ²² Dixerunt ergo ei: "Quis es? Ut responsum demus his, qui miserunt nos. Quid dicis de teipso?". ²³ Ait: "Ego vox clamantis in deserto: "Dirigite viam Domini", sicut dixit Isaias propheta". ²⁴ Et qui missi fuerant, erant ex pharisaeis; ²⁵ et interrogaverunt eum et dixerunt ei: "Quid ergo baptizas, si tu non es Christus neque Elias neque propheta?". ²⁶ Respondit eis Ioannes dicens: "Ego baptizo in aqua; medius vestrum stat, quem vos non scitis, ²⁷ qui post me venturus est, cuius ego non sum dignus, ut solvam eius corrigiam calceamenti". ²⁸ Haec in Bethania facta sunt trans Iordanem, ubi erat Ioannes baptizans.

²⁹ Altera die videt Iesum venientem ad se et ait: "Ecce agnus Dei, qui tollit peccatum mundi. ³⁰ Hic est, de quo dixi: Post me venit vir, qui ante me factus est, quia prior me erat. ³¹ Et ego nesciebam eum, sed ut manifestetur Israel, propterea veni ego in aqua baptizans". ³² Et testimonium perhibuit Ioannes dicens: "Vidi Spiritum descendentem quasi columbam de caelo, et mansit super eum; ³³ et ego nesciebam eum, sed, qui misit me baptizare in aqua, ille mihi dixit: "Super quem videris Spiritum descendentem et manentem super eum, hic est qui baptizat in Spiritu Sancto". ³⁴ Et ego vidi et testimonium perhibui quia hic est Filius Dei". ³⁵ Altera die iterum stabat Ioannes et ex discipulis eius duo, ³⁶ et respiciens Iesum ambulantem dicit: "Ecce agnus Dei".

³⁷ Et audierunt eum duo discipuli loquentem et secuti sunt Iesum. ³⁸ Conversus autem Iesus et videns eos sequentes se dicit eis: "Quid quaeritis?". Qui dixerunt ei: "Rabbi quod dicitur interpretatum Magister ubi manes?". ³⁹ Dicit eis: "Venite et videbitis". Venerunt ergo et viderunt, ubi maneret, et apud eum manserunt die illo; hora erat quasi decima. ⁴⁰ Erat Andreas, frater Simonis Petri, unus ex duobus, qui audierant ab Ioanne et secuti fuerant eum. ⁴¹ Invenit hic primum fratrem suum Simonem et dicit ei: "Invenimus Messiam" quod est interpretatum Christus C; ⁴² adduxit eum ad Iesum. Intuitus eum Iesus dixit: "Tu es Simon filius Ioannis; tu vocaberis Cephas" quod interpretatur Petrus C.

⁴³ In crastinum voluit exire in Galilaeam et invenit Philippum. Et dicit ei Iesus: "Sequere me". ⁴⁴ Erat autem Philippus a Bethsaida, civitate Andreae et Petri. ⁴⁵ Invenit Philippus Nathanael et dicit ei: "Quem scripsit Moyses in Lege et Prophetae invenimus, Iesum filium Ioseph a Nazareth". ⁴⁶ Et dixit ei Nathanael: "A Nazareth potest aliquid boni esse?". Dicit ei Philippus: "Veni et vide". ⁴⁷ Vidit Iesus Nathanael venientem ad se et dicit de eo: "Ecce vere Israelita, in quo dolus non est". ⁴⁸ Dicit ei Nathanael: "Unde me nosti?". Respondit Iesus et dixit ei: "Priusquam te Philippus vocaret, cum esses sub ficu, vidi te". ⁴⁹ Respondit ei Nathanael: "Rabbi, tu es Filius Dei, tu rex es Israel!". ⁵⁰ Respondit Iesus et dixit ei: "Quia dixi tibi: Vidi te sub ficu, credis? Maiora his videbis". ⁵¹ Et dicit ei: "Amen, amen dico vobis: Videbitis caelum apertum et angelos Dei ascendentes et descendentes supra Filium hominis".