Read the Bible

¹ Et factum est in una dierum, docente illo populum in tem plo et evangelizante, supervenerunt principes sacerdotum et scribae cum senioribus ² et aiunt dicentes ad illum: "Dic nobis: In qua potestate haec facis, aut quis est qui dedit tibi hanc potestatem?". ³ Respondens autem dixit ad illos: "Interrogabo vos et ego verbum; et dicite mihi: ⁴ Baptismum Ioannis de caelo erat an ex hominibus?". ⁵ At illi cogitabant inter se dicentes: "Si dixerimus: "De caelo", dicet: "Quare non credidistis illi?; ⁶ si autem dixerimus: "Ex hominibus", plebs universa lapidabit nos; certi sunt enim Ioannem prophetam esse". ⁷ Et responderunt se nescire unde esset. ⁸ Et Iesus ait illis: "Neque ego dico vobis in qua potestate haec facio".

⁹ Coepit autem dicere ad plebem parabolam hanc: "Homo plantavit vineam et locavit eam colonis et ipse peregre fuit multis temporibus. ¹⁰ Et in tempore misit ad cultores servum, ut de fructu vineae darent illi; cultores autem caesum dimiserunt eum inanem. ¹¹ Et addidit alterum servum mittere; illi autem hunc quoque caedentes et afficientes contumelia dimiserunt inanem. ¹² Et addidit tertium mittere; qui et illum vulnerantes eiecerunt. ¹³ Dixit autem dominus vineae: "Quid faciam? Mittam filium meum dilectum; forsitan hunc verebuntur". ¹⁴ Quem cum vidissent coloni, cogitaverunt inter se dicentes: "Hic est heres. Occidamus illum, ut nostra fiat hereditas". ¹⁵ Et eiectum illum extra vineam occiderunt. Quid ergo faciet illis dominus vineae? ¹⁶ Veniet et perdet colonos istos et dabit vineam aliis". Quo audito, dixerunt: "Absit!". ¹⁷ Ille autem aspiciens eos ait: "Quid est ergo hoc, quod scriptum est: "Lapidem quem reprobaverunt aedificantes, hic factus est in caput anguli"? ¹⁸ Omnis, qui ceciderit supra illum lapidem, conquassabitur; supra quem autem ceciderit, comminuet illum". ¹⁹ Et quaerebant scribae et principes sacerdotum mittere in illum manus in illa hora et timuerunt populum; cognoverunt enim quod ad ipsos dixerit similitudinem istam.

²⁰ Et observantes miserunt insidiatores, qui se iustos simularent, ut caperent eum in sermone, et sic traderent illum principatui et potestati praesidis. ²¹ Et interrogaverunt illum dicentes: "Magister, scimus quia recte dicis et doces et non accipis personam, sed in veritate viam Dei doces. ²² Licet nobis dare tributum Caesari an non?". ²³ Considerans autem dolum illorum dixit ad eos: ²⁴ "Ostendite mihi denarium. Cuius habet imaginem et inscriptionem?". ²⁵ At illi dixerunt: "Caesaris". Et ait illis: "Reddite ergo, quae Caesaris sunt, Caesari et, quae Dei sunt, Deo". ²⁶ Et non potuerunt verbum eius reprehendere coram plebe et mirati in responso eius tacuerunt.

²⁷ Accesserunt autem quidam sadducaeorum, qui negant esse resurrectionem, et interrogaverunt eum ²⁸ dicentes: "Magister, Moyses scripsit nobis, si frater alicuius mortuus fuerit habens uxorem et hic sine filiis fuerit, ut accipiat eam frater eius uxorem et suscitet semen fratri suo. ²⁹ Septem ergo fratres erant: et primus accepit uxorem et mortuus est sine filiis; ³⁰ et sequens ³¹ et tertius accepit illam, similiter autem et septem non reliquerunt filios et mortui sunt. ³² Novissima mortua est et mulier. ³³ Mulier ergo in resurrectione cuius eorum erit uxor? Si quidem septem habuerunt eam uxorem". ³⁴ Et ait illis Iesus: "Filii saeculi huius nubunt et traduntur ad nuptias; ³⁵ illi autem, qui digni habentur saeculo illo et resurrectione ex mortuis, neque nubunt neque ducunt uxores. ³⁶ Neque enim ultra mori possunt: aequales enim angelis sunt et filii sunt Dei, cum sint filii resurrectionis. ³⁷ Quia vero resurgant mortui, et Moyses ostendit secus rubum, sicut dicit: "Dominum Deum Abraham et Deum Isaac et Deum Iacob". ³⁸ Deus autem non est mortuorum sed vivorum: omnes enim vivunt ei".

³⁹ Respondentes autem quidam scribarum dixerunt: "Magister, bene dixisti". ⁴⁰ Et amplius non audebant eum quidquam interrogare. ⁴¹ Dixit autem ad illos: "Quomodo dicunt Christum filium David esse? ⁴² Ipse enim David dicit in libro Psalmorum: "Dixit Dominus Domino meo: Sede a dextris meis, ⁴³ donec ponam inimicos tuos scabellum pedum tuorum". ⁴⁴ David ergo Dominum illum vocat; et quomodo filius eius est?". ⁴⁵ Audiente autem omni populo, dixit discipulis suis: ⁴⁶ "Attendite a scribis, qui volunt ambulare in stolis et amant salutationes in foro et primas cathedras in synagogis et primos discubitus in conviviis, ⁴⁷ qui devorant domos viduarum et simulant longam orationem. Hi accipient damnationem maiorem".