Read the Bible

¹ Accesseruntque principes familiarum Levi ad Eleazarum sacerdotem et Iosue filium Nun et ad duces cognationum per singulas tribus filiorum Israel ² locutique sunt ad eos in Silo terrae Chanaan atque dixerunt: "Dominus praecepit per manum Moysi, ut darentur nobis urbes ad habitandum et suburbana earum ad alenda iumenta". ³ Dederuntque filii Israel Levitis de possessionibus suis, iuxta imperium Domini, civitates illas et suburbana earum. ⁴ Egressaque est sors in familias Caath: et acceperunt filii Aaron sacerdotis de tribubus Iudae et Simeon et Beniamin civitates tredecim. ⁵ Et reliqui filiorum Caath, id est Levitae, acceperunt de tribubus Ephraim et Dan et dimidia tribu Manasse civitates decem. ⁶ Porro filiis Gerson egressa est sors, ut acciperent de tribubus Issachar et Aser et Nephthali dimidiaque tribu Manasse in Basan civitates numero tredecim. ⁷ Et filiis Merari per cognationes suas de tribubus Ruben et Gad et Zabulon urbes duodecim. ⁸ Dederuntque filii Israel Levitis civitates illas et suburbana earum, sicut praecepit Dominus per manum Moysi, singulis sorte tribuentes.

⁹ De tribubus filiorum Iudae et Simeon dederunt civitates, quarum ista sunt nomina, ¹⁰ filiis Aaron ex familiis Caath levitici generis prima enim sors illis egressa est C: ¹¹ Cariatharbe (id est civitas Arbe), patris Enac, quae vocatur Hebron, in monte Iudae et suburbana eius per circuitum. ¹² Agros vero et villas eius dederant Chaleb filio Iephonne ad possidendum. ¹³ Dederunt ergo filiis Aaron sacerdotis Hebron confugii civitatem ac suburbana eius et Lobnam cum suburbanis suis ¹⁴ et Iether et Esthemo ¹⁵ et Helon et Dabir ¹⁶ et Ain et Iutta et Bethsames cum suburbanis suis: civitates novem de tribubus illis duabus. ¹⁷ De tribu autem Beniamin Gabaon et Gabaa ¹⁸ et Anathoth et Almath cum suburbanis suis: civitates quattuor. ¹⁹ Omnes simul civitates filiorum Aaron sacerdotis tredecim cum suburbanis suis. ²⁰ Reliquis vero ex familiis filiorum Caath Levitis haec est data possessio: ²¹ de tribu Ephraim urbs confugii Sichem cum suburbanis suis in monte Ephraim et Gazer ²² et Cibsaim et Bethoron cum suburbanis suis: civitates quattuor. ²³ De tribu quoque Dan Elthece et Gebbethon ²⁴ et Aialon et Gethremmon cum suburbanis suis: civitates quattuor. ²⁵ Porro de dimidia tribu Manasse Thanach et Gethremmon cum suburbanis suis: civitates duae. ²⁶ Omnes civitates decem et suburbana earum datae sunt filiis Caath inferioris gradus. ²⁷ Filiis quoque Gerson levitici generis dederunt de dimidia tribu Manasse confugii civitatem Golan in Basan et Astharoth cum suburbanis suis: civitates duas. ²⁸ Porro de tribu Issachar Cesion et Dabereth ²⁹ et Iaramoth et Engannim cum suburbanis suis: civitates quattuor. ³⁰ De tribu autem Aser Masal et Abdon ³¹ et Helcath et Rohob cum suburbanis suis: civitates quattuor. ³² De tribu quoque Nephthali civitas confugii Cedes in Galilaea et Ammothdor et Carthan cum suburbanis suis: civitates tres. ³³ Omnes urbes familiarum Gerson tredecim cum suburbanis suis. ³⁴ Filiis autem Merari Levitis inferioris gradus per familias suas data est de tribu Zabulon Iecnaam et Cartha ³⁵ et Remmon et Naalol: civitates quattuor cum suburbanis suis. ³⁶ De tribu Ruben ultra Iordanem contra Iericho civitas refugii Bosor in solitudine planitiei et Iasa ³⁷ et Cademoth et Mephaath: civitates quattuor cum suburbanis suis. ³⁸ Et de tribu Gad civitas confugii Ramoth in Galaad et Mahanaim ³⁹ et Hesebon et Iazer: civitates quattuor cum suburbanis suis. ⁴⁰ Omnes urbes filiorum Merari per familias reliquas de cognationibus Levitarum duodecim. ⁴¹ Itaque universae civitates Levitarum in medio possessionis filiorum Israel fuerunt quadraginta octo ⁴² cum suburbanis suis, singulae cum suburbanis suis in circuitu.

⁴³ Deditque Dominus Israeli omnem terram, quam traditurum se patribus eorum iuraverat, et possederunt illam atque habitaverunt in ea. ⁴⁴ Deditque Dominus eis requiem secundum omnia, quae iuraverat patribus eorum, nullusque eis hostium resistere ausus est, sed cunctos in eorum dicionem redegit. ⁴⁵ Ne unum quidem verbum bonum, quod locutus est ad domum Israel, irritum fuit, sed rebus expleta sunt omnia.