Read the Bible

¹ Postea manifestavit se ite rum Iesus discipulis ad mare Tiberiadis; manifestavit autem sic. ² Erant simul Simon Petrus et Thomas, qui dicitur Didymus, et Nathanael, qui erat a Cana Galilaeae, et filii Zebedaei et alii ex discipulis eius duo. ³ Dicit eis Simon Petrus: "Vado piscari". Dicunt ei: "Venimus et nos tecum". Exierunt et ascenderunt in navem; et illa nocte nihil prendiderunt. ⁴ Mane autem iam facto, stetit Iesus in litore; non tamen sciebant discipuli quia Iesus est. ⁵ Dicit ergo eis Iesus: "Pueri, numquid pulmentarium habetis?". Responderunt ei: "Non". ⁶ Ille autem dixit eis: "Mittite in dexteram navigii rete et invenietis". Miserunt ergo et iam non valebant illud trahere a multitudine piscium. ⁷ Dicit ergo discipulus ille, quem diligebat Iesus, Petro: "Dominus est!". Simon ergo Petrus, cum audisset quia Dominus est, tunicam succinxit se, erat enim nudus, et misit se in mare; ⁸ alii autem discipuli navigio venerunt, non enim longe erant a terra, sed quasi cubitis ducentis, trahentes rete piscium. ⁹ Ut ergo descenderunt in terram, vident prunas positas et piscem superpositum et panem. ¹⁰ Dicit eis Iesus: "Afferte de piscibus, quos prendidistis nunc". ¹¹ Ascendit ergo Simon Petrus et traxit rete in terram, plenum magnis piscibus centum quinquaginta tribus; et cum tanti essent, non est scissum rete. ¹² Dicit eis Iesus: "Venite, prandete". Nemo autem audebat discipulorum interrogare eum: "Tu quis es?", scientes quia Dominus est. ¹³ Venit Iesus et accipit panem et dat eis et piscem similiter. ¹⁴ Hoc iam tertio manifestatus est Iesus discipulis, cum resurrexisset a mortuis.

¹⁵ Cum ergo prandissent, dicit Simoni Petro Iesus: "Simon Ioannis, diligis me plus his?". Dicit ei: "Etiam, Domine, tu scis quia amo te". Dicit ei: "Pasce agnos meos". ¹⁶ Dicit ei iterum secundo: "Simon Ioannis, diligis me?". Ait illi: "Etiam, Domine, tu scis quia amo te". Dicit ei: "Pasce oves meas". ¹⁷ Dicit ei tertio: "Simon Ioannis, amas me?". Contristatus est Petrus quia dixit ei tertio: "Amas me?", et dicit ei: "Domine, tu omnia scis, tu cognoscis quia amo te". Dicit ei: "Pasce oves meas. ¹⁸ Amen, amen dico tibi: Cum esses iunior, cingebas teipsum et ambulabas, ubi volebas; cum autem senueris, extendes manus tuas, et alius te cinget et ducet, quo non vis". ¹⁹ Hoc autem dixit significans qua morte clarificaturus esset Deum. Et hoc cum dixisset, dicit ei: "Sequere me".

²⁰ Conversus Petrus videt illum discipulum, quem diligebat Iesus, sequentem, qui et recubuit in cena super pectus eius et dixit: "Domine, quis est qui tradit te?". ²¹ Hunc ergo cum vidisset Petrus, dicit Iesu: "Domine, hic autem quid?". ²² Dicit ei Iesus: "Si eum volo manere donec veniam, quid ad te? Tu me sequere". ²³ Exivit ergo sermo iste in fratres, quia discipulus ille non moritur. Non autem dixit ei Iesus: "Non moritur", sed: "Si eum volo manere donec veniam, quid ad te?". ²⁴ Hic est discipulus, qui testimonium perhibet de his et scripsit haec; et scimus quia verum est testimonium eius. ²⁵ Sunt autem et alia multa, quae fecit Iesus; quae, si scribantur per singula, nec ipsum arbitror mundum capere eos, qui scribendi sunt, libros.