Read the Bible

¹ Addidit quoque Iob assumens parabolam suam et di xit: ² "Quis mihi tribuat, ut sim iuxta menses pristinos, secundum dies, quibus Deus custodiebat me? ³ Quando splendebat lucerna eius super caput meum, et ad lumen eius ambulabam in tenebris. ⁴ Sicut fui in diebus adulescentiae meae, quando familiaris Deus erat in tabernaculo meo, ⁵ quando erat Omnipotens mecum, et in circuitu meo pueri mei, ⁶ quando lavabam pedes meos lacte, et petra fundebat mihi rivos olei.

⁷ Quando procedebam ad portam civitatis et in platea parabam cathedram mihi, ⁸ videbant me iuvenes et abscondebantur, et senes assurgentes stabant. ⁹ Principes cessabant loqui et digitum superponebant ori suo. ¹⁰ Vocem suam cohibebant duces, et lingua eorum palato suo adhaerebat. ¹¹ Auris audiens beatificabat me, et oculus videns testimonium reddebat mihi, ¹² eo quod liberassem pauperem vociferantem et pupillum, cui non esset adiutor. ¹³ Benedictio perituri super me veniebat, et cor viduae iubilare feci. ¹⁴ Iustitia indutus sum et vestivi me, sicut vestimento et diademate, iudicio meo. ¹⁵ Oculus fui caeco et pes claudo; ¹⁶ pater eram pauperum et causam viri ignoti diligentissime investigabam. ¹⁷ Conterebam molas iniqui et de dentibus illius auferebam praedam.

¹⁸ Dicebamque: In nidulo meo moriar et sicut palma multiplicabo dies. ¹⁹ Radix mea aperta est secus aquas, et ros morabitur in ramis meis. ²⁰ Gloria mea semper innovabitur, et arcus meus in manu mea instaurabitur. ²¹ Qui me audiebant, blandiebantur et intenti tacebant ad consilium meum. ²² Verbis meis addere nihil audebant, et super illos stillabat eloquium meum. ²³ Exspectabant me sicut pluviam et os suum aperiebant quasi ad imbrem serotinum. ²⁴ Si quando ridebam ad eos, non credebant, et lux vultus mei non cadebat in terram. ²⁵ Si voluissem ire ad eos, sedebam primus; cumque sederem quasi rex, circumstante exercitu, eram tamen maerentium consolator.