Read the Bible

¹ Respondens autem Baldad Suhites dixit: ² "Usque ad quem finem verba iactabitis? Intellegite prius, et sic loquamur. ³ Quare reputati sumus ut iumenta et sorduimus coram vobis? ⁴ Qui perdis animam tuam in furore tuo, numquid propter te derelinquetur terra, et transferentur rupes de loco suo?

⁵ Etenim lux impii exstinguetur, nec splendebit flamma ignis eius. ⁶ Lux obtenebrescet in tabernaculo illius, et lucerna, quae super eum est, exstinguetur. ⁷ Arctabuntur gressus virtutis eius, et praecipitabit eum consilium suum. ⁸ Immissi sunt in rete pedes eius, et in reticulo ambulat. ⁹ Tenet plantam illius laqueus, et firmatur super eum tendiculum. ¹⁰ Abscondita est in terra pedica eius, et decipula illius super semitam.

¹¹ Undique terrent eum formidines et involvunt pedes eius. ¹² Attenuatur fame robur eius, et pernicies parata costis illius. ¹³ Devorat partes cutis eius, consumat membra illius primogenitus mortis. ¹⁴ Avellitur de tabernaculo suo fiducia eius, et urges eum ad regem formidinum. ¹⁵ Habitas in tabernaculo, quod iam non est ei; aspergitur in habitatione eius sulphur. ¹⁶ Deorsum radices eius siccantur, sursum autem atteruntur rami eius. ¹⁷ Memoria illius periit de terra, et non celebrabitur nomen eius in plateis. ¹⁸ Expellent eum de luce in tenebras et de orbe transferent eum. ¹⁹ Non erit semen eius neque progenies in populo suo, nec ullae reliquiae in commoratione eius. ²⁰ In die eius stupebunt novissimi, et primos invadet horror. ²¹ Haec sunt ergo tabernacula iniqui; et iste locus eius, qui ignorat Deum".