Read the Bible

¹ Spiritus meus attenuatus est, dies mei exstincti, et solum mihi superest sepulcrum. ² Nonne irrisiones circumdant me, et in amaritudinibus moratur oculus meus? ³ Pone pignus pro me iuxta te; et quis umquam spondens percutiet manum meam? ⁴ Cor eorum longe fecisti a disciplina; propterea non exaltabuntur. ⁵ Praedam pollicetur sociis, sed oculi filiorum eius deficient. ⁶ Posuit me quasi in proverbium vulgi et conspuendum in faciem. ⁷ Caligavit ab indignatione oculus meus, et membra mea quasi in umbram redacta sunt. ⁸ Stupebunt iusti super hoc, et innocens contra impium excitabitur. ⁹ Et tenebit iustus viam suam, et mundus manibus addet fortitudinem.

¹⁰ Igitur omnes vos convertimini et venite, et non inveniam in vobis ullum sapientem. ¹¹ Dies mei transierunt, cogitationes meae dissipatae sunt et desideria cordis mei. ¹² Noctem verterunt in diem; et rursum post tenebras properat lux. ¹³ Si sustinuero, infernus domus mea est; et in tenebris stravi lectulum meum. ¹⁴ Putredini dixi: Pater meus es!; Mater mea et soror mea! vermibus. ¹⁵ Ubi est ergo nunc praestolatio mea, et patientiam meam quis considerat? ¹⁶ In profundissimum infernum descendent omnia mea; simul in pulvere erit requies mihi?".