Read the Bible

¹ Consolamini, consolamini populum meum, dicit Deus vester. ² Loquimini ad cor Ierusalem et clamate ad eam, quoniam completa est militia eius, expiata est iniquitas illius; suscepit de manu Domini duplicia pro omnibus peccatis suis.

³ Vox clamantis: "In deserto parate viam Domini, rectas facite in solitudine semitas Dei nostri. ⁴ Omnis vallis exaltetur, et omnis mons et collis humilietur; et fiant prava in directa, et aspera in plana: ⁵ et revelabitur gloria Domini, et videbit omnis caro pariter quod os Domini locutum est". ⁶ Vox dicentis: "Clama!". Et dixi: "Quid clamabo?". Omnis caro fenum, et omnis gloria eius quasi flos agri; ⁷ exsiccatum est fenum, et cecidit flos, quia spiritus Domini sufflavit in eo. Vere fenum est populus. ⁸ Exsiccatum est fenum, et cecidit flos; verbum autem Dei nostri manet in aeternum.

⁹ Super montem excelsum ascende, tu, quae evangelizas Sion; exalta in fortitudine vocem tuam, quae evangelizas Ierusalem; exalta, noli timere; dic civitatibus Iudae: "Ecce Deus vester, ¹⁰ ecce Dominus Deus in virtute venit, et brachium eius dominatur: ecce merces eius cum eo, et praemium illius coram illo. ¹¹ Sicut pastor gregem suum pascit, in brachio suo congregat agnos et in sinu suo levat; fetas ipse portat".

¹² Quis mensus est pugillo aquas et caelos palmo disposuit, modio continuit pulverem terrae et libravit in pondere montes et colles in statera? ¹³ Quis direxit spiritum Domini? Aut quis consilium suum ostendit illi? ¹⁴ Cum quo iniit consilium, et instruxit eum et docuit eum semitam iustitiae et erudivit eum scientiam et viam prudentiae ostendit illi? ¹⁵ Ecce gentes quasi stilla situlae et quasi momentum pulveris in statera reputantur; ecce insulae quasi pulvis exiguus. ¹⁶ Et Libanus non sufficiet ad succendendum, et animalia eius non sufficient ad holocaustum. ¹⁷ Omnes gentes, quasi non sint, coram eo; quasi nihilum et inane reputantur ab eo.

¹⁸ Cui ergo similem facitis Deum? Aut quam imaginem ponitis ei? ¹⁹ Sculptile conflat faber, et aurifex auro figurat illud, et laminis argenteis argentarius. ²⁰ Nimis pauper, ut offerat lignum imputribile: exquirit sibi sapientem artificem, ut statuat simulacrum, quod non moveatur. ²¹ Numquid non scitis? Numquid non audistis? Numquid non annuntiatum est vobis ab initio? Numquid non intellexistis fundamenta terrae? ²² Qui sedet super gyrum terrae, et habitatores eius sunt quasi locustae; qui extendit sicut velum caelos et expandit eos sicut tabernaculum ad inhabitandum; ²³ qui redigit in nihilum principes, iudices terrae velut inane facit. ²⁴ Et quidem neque plantatus neque satus neque radicatus in terra truncus eorum; repente flavit in eos, et aruerunt, et turbo quasi stipulam aufert eos. ²⁵ "Et cui assimilabitis me, quasi aequalis ei sim ego?", dicit Sanctus. ²⁶ Levate in excelsum oculos vestros et videte: Quis creavit haec? Qui educit in numero militiam eorum et omnes ex nomine vocat; prae multitudine fortitudinis et roboris virtutisque eius neque unum deest.

²⁷ Quare dicis, Iacob, et loqueris, Israel: "Abscondita est via mea a Domino, et a Deo meo iudicium meum transit?". ²⁸ Numquid nescis? Aut non audisti? Deus sempiternus Dominus, qui creavit terminos terrae; non deficiet neque laborabit, nec est investigatio sapientiae eius. ²⁹ Qui dat lasso virtutem et invalido robur multiplicat. ³⁰ Deficient pueri et laborabunt, et iuvenes lapsu labentur; ³¹ qui autem sperant in Domino, mutabunt fortitudinem, assument pennas sicut aquilae, current et non laborabunt, ambulabunt et non deficient.