Read the Bible

¹ [12:2 Ephraim pascit ventum et sequitur aestum; tota die mendacium et violentiam multiplicat et foedus cum Assyriis init et oleum in Aegyptum fert. ² [12:3] Iudicium ergo Domini cum Iuda, et visitatio super Iacob; iuxta vias eius et iuxta opera eius reddet ei. ³ [12:4] In utero supplantavit fratrem suum et in robore suo luctatus est cum Deo. ⁴ [12:5] Et luctatus est cum angelo et praevaluit; flevit et deprecatus est eum. In Bethel invenit eum et ibi locutus est nobiscum ⁵ [12:6] Dominus, Deus exercituum: Dominus memoriale eius. ⁶ [12:7] "Et tu ad Deum tuum converteris; caritatem et iudicium custodi et spera in Deo tuo semper".

⁷ [12:8] Chanaan, in manu eius statera dolosa, fraudem diligit. ⁸ [12:9] Et dixit Ephraim: "Verumtamen dives effectus sum, inveni opes mihi, omnes labores mei non invenient mihi iniquitatem, quam peccavi". ⁹ [12:10] "Ego autem Dominus, Deus tuus ex terra Aegypti; adhuc sedere te faciam in tabernaculis, sicut in diebus conventus. ¹⁰ [12:11] Et loquar ad prophetas et ego visionem multiplicabo et in manu prophetarum proponam similitudines". ¹¹ [12:12] Si Galaad iniquitas fuerat, prorsus inanes facti sunt; in Galgala bobus immolantes, etiam altaria eorum erunt quasi acervi super sulcos agri. ¹² [12:13] Fugit Iacob in regionem Aram; et servivit Israel pro uxore et pro uxore custos fuit. ¹³ [12:14] Per prophetam autem eduxit Dominus Israel de Aegypto, et per prophetam custoditus est. ¹⁴ [12:15] Ad iracundiam provocavit Ephraim amarissime, sed sanguinem eius super eum relinquet et opprobrium eius retribuet ei Dominus suus.