Read the Bible

¹ Habuit ergo et prius praecepta cultus et Sanctum huius saeculi. ² Tabernaculum enim praeparatum est primum, in quo inerat candelabrum et mensa et propositio panum, quod dicitur Sancta; ³ post secundum autem velamentum, tabernaculum, quod dicitur Sancta Sanctorum, ⁴ aureum habens turibulum et arcam testamenti circumtectam ex omni parte auro, in qua urna aurea habens manna et virga Aaron, quae fronduerat, et tabulae testamenti, ⁵ superque eam cherubim gloriae obumbrantia propitiatorium; de quibus non est modo dicendum per singula. ⁶ His vero ita praeparatis, in prius quidem tabernaculum semper intrant sacerdotes sacrorum officia consummantes; ⁷ in secundum autem semel in anno solus pontifex, non sine sanguine, quem offert pro suis et populi ignorantiis;

⁸ hoc significante Spiritu Sancto, nondum propalatam esse sanctorum viam, adhuc priore tabernaculo habente statum; ⁹ quae parabola est temporis instantis, iuxta quam munera et hostiae offeruntur, quae non possunt iuxta conscientiam perfectum facere servientem, ¹⁰ solummodo in cibis et in potibus et variis baptismis, quae sunt praecepta carnis usque ad tempus correctionis imposita. ¹¹ Christus autem cum advenit pontifex futurorum bonorum, per amplius et perfectius tabernaculum, non manufactum, id est non huius creationis, ¹² neque per sanguinem hircorum et vitulorum sed per proprium sanguinem introivit semel in Sancta, aeterna redemptione inventa. ¹³ Si enim sanguis hircorum et taurorum et cinis vitulae aspersus inquinatos sanctificat ad emundationem carnis, ¹⁴ quanto magis sanguis Christi, qui per Spiritum aeternum semetipsum obtulit immaculatum Deo, emundabit conscientiam nostram ab operibus mortuis ad serviendum Deo viventi.

¹⁵ Et ideo novi testamenti mediator est, ut, morte intercedente in redemptionem earum praevaricationum, quae erant sub priore testamento, repromissionem accipiant, qui vocati sunt aeternae hereditatis. ¹⁶ Ubi enim testamentum, mors necesse est afferatur testatoris; ¹⁷ testamentum autem in mortuis est confirmatum, nondum enim valet, dum vivit, qui testatus est. ¹⁸ Unde ne prius quidem sine sanguine dedicatum est; ¹⁹ enuntiato enim omni mandato secundum legem a Moyse universo populo, accipiens sanguinem vitulorum et hircorum cum aqua et lana coccinea et hyssopo, ipsum librum et omnem populum aspersit ²⁰ dicens: "Hic sanguis testamenti, quod mandavit ad vos Deus"; ²¹ etiam tabernaculum et omnia vasa ministerii sanguine similiter aspersit. ²² Et omnia paene in sanguine mundantur secundum legem, et sine sanguinis effusione non fit remissio.

²³ Necesse erat ergo figuras quidem caelestium his mundari, ipsa autem caelestia melioribus hostiis quam istis. ²⁴ Non enim in manufacta Sancta Christus introivit, quae sunt similitudo verorum, sed in ipsum caelum, ut appareat nunc vultui Dei pro nobis; ²⁵ neque ut saepe offerat semetipsum, quemadmodum pontifex intrat in Sancta per singulos annos in sanguine alieno. ²⁶ Alioquin oportebat eum frequenter pati ab origine mundi; nunc autem semel in consummatione saeculorum ad destitutionem peccati per sacrificium sui manifestatus est. ²⁷ Et quemadmodum statutum est hominibus semel mori, post hoc autem iudicium, ²⁸ sic et Christus, semel oblatus ad multorum auferenda peccata, secundo sine peccato apparebit exspectantibus se in salutem.