Read the Bible

¹ Oraculum, quod vidit Habacuc propheta. ² Usquequo, Domine, clamabo, et non exaudis? Vociferabor ad te: "Violentia!", et non salvas? ³ Quare ostendisti mihi iniquitatem et malitiam vides? Et vastitas et violentia est coram me, et facta est contentio, et iurgium exoritur. ⁴ Propter hoc languet lex, et non pervenit usque ad finem iudicium. Quia impius praevalet adversus iustum, propterea egreditur iudicium perversum.

⁵ "Aspicite in gentibus et videte, admiramini et obstupescite, quia opus facio in diebus vestris, quod nemo credet, cum narrabitur. ⁶ Quia ecce ego suscitabo Chaldaeos, gentem amaram et velocem, ambulantem super latitudinem terrae, ut possideat tabernacula non sua. ⁷ Horribilis et terribilis est, ex semetipsa iudicium eius et maiestas eius egredietur. ⁸ Leviores pardis equi eius et saeviores lupis deserti; et accurrunt equites eius: equites namque eius de longe venient, volabunt quasi aquila festinans ad comedendum. ⁹ Omnes, ut violentiam faciant, venient, omnes facies eorum ventus urens; et congregabunt quasi arenam captivos. ¹⁰ Et ipsa reges subsannabit, tyrannis illudet; ipsa super omnem munitionem ridebit et comportabit aggerem et capiet eam. ¹¹ Tunc ultra progrediens quasi ventus pertransibit et constituet fortitudinem suam deum suum".

¹² Numquid non tu a principio, Domine, Deus meus, sanctus meus, qui non morieris? Domine, ad iudicium posuisti eam; petra mea, ad corripiendum fundasti eam. ¹³ Mundi sunt oculi tui, ne videas malum; et respicere ad iniquitatem non poteris. Quare respicis super inique agentes et taces, devorante impio iustiorem se? ¹⁴ Fecisti homines quasi pisces maris, quasi reptile non habens principem super se. ¹⁵ Omnes in hamo sublevat, trahit eos in sagena sua et congregat in rete suo; super hoc laetatur et exsultat. ¹⁶ Propterea immolat sagenae suae et sacrificat reti suo, quia in ipsis incrassata est portio eius, et cibus eius pinguis. ¹⁷ Propter hoc ergo evaginabit gladium suum semper, ut interficiat gentes sine misericordia?