Read the Bible

¹ Postquam autem audivit verba filiorum Laban dicen tium: "Tulit Iacob omnia, quae fuerunt patris nostri, et de patris nostri facultate acquisivit has divitias", ² animadvertit quoque faciem Laban quod non esset erga se sicut heri et nudiustertius. ³ Et dixit Dominus ad Iacob: "Revertere in terram patrum tuorum et ad cognationem tuam, eroque tecum". ⁴ Misit Iacob et vocavit Rachel et Liam in agrum, ubi pascebat greges, ⁵ dixitque eis: "Video faciem patris vestri quod non sit erga me sicut heri et nudiustertius; Deus autem patris mei fuit mecum, ⁶ et ipsae nostis quod totis viribus meis servierim patri vestro. ⁷ Sed pater vester circumvenit me et mutavit mercedem meam decem vicibus; et tamen non dimisit eum Deus, ut noceret mihi. ⁸ Si quando dixit: "Variae erunt mercedes tuae", pariebant omnes oves varios fetus. Quando vero e contrario ait: "Striata quaeque accipies pro mercede", omnes greges striata pepererunt. ⁹ Tulitque Deus substantiam patris vestri et dedit mihi. ¹⁰ Postquam enim conceptus gregis tempus advenerat, levavi oculos meos et vidi in somnis ascendentes mares super feminas, striatos et varios et respersos. ¹¹ Dixitque angelus Dei ad me in somnis: "Iacob". Et ego respondi: Adsum. ¹² Qui ait: "Leva oculos tuos et vide universos masculos ascendentes super feminas, striatos et varios atque respersos. Vidi enim omnia, quae fecit tibi Laban. ¹³ Ego sum Deus Bethel, ubi unxisti lapidem et votum vovisti mihi. Nunc ergo surge et egredere de terra hac revertens in terram nativitatis tuae"". ¹⁴ Responderunt ei Rachel et Lia: "Numquid habemus adhuc partem et hereditatem in domo patris nostri? ¹⁵ Nonne quasi alienas reputavit nos et vendidit nos comeditque pretium nostrum? ¹⁶ Sed omnes opes, quas tulit Deus patri nostro, nobis abstulit ac filiis nostris; unde omnia, quae praecepit tibi Deus, fac".

¹⁷ Surrexit itaque Iacob et imposuit liberos suos ac coniuges suas super camelos. ¹⁸ Tulitque omnes greges suos et omnem substantiam suam, quidquid in Paddanaram acquisierat, ut iret ad Isaac patrem suum in terram Chanaan. ¹⁹ Eo tempore Laban ierat ad tondendas oves, et Rachel furata est theraphim patris sui. ²⁰ Iacob autem decepit cor Laban, non indicans ei quod fugeret. ²¹ Cumque fugisset cum omnibus, quae possidebat, et, amne transmisso, pergeret contra montem Galaad, ²² nuntiatum est Laban die tertio quod fugisset Iacob. ²³ Qui, assumptis fratribus suis, persecutus est eum diebus septem et comprehendit eum in monte Galaad. ²⁴ Venit autem Deus ad Laban Aramaeum per somnium noctis dixitque ei: "Cave, ne quidquam loquaris contra Iacob!".

²⁵ Iamque Iacob extenderat in monte tabernaculum, cum Laban, consecutus eum cum fratribus suis, in eodem monte Galaad fixit tentorium. ²⁶ Et dixit ad Iacob: "Quare ita egisti et decepisti cor meum, abigens filias meas quasi captivas gladio? ²⁷ Cur clam fugisti et decepisti me, non indicans mihi, ut prosequerer te cum gaudio et canticis et tympanis et citharis? ²⁸ Non es passus, ut oscularer filios meos ac filias; stulte operatus es. Et nunc ²⁹ valet quidem manus mea reddere tibi malum, sed Deus patris vestri heri dixit mihi: "Cave, ne loquaris contra Iacob quidquam!". ³⁰ Esto, profectus es, quia desiderio tibi erat domus patris tui; cur furatus es deos meos?". ³¹ Respondit Iacob: "Quia timui. Dixi enim, ne forte violenter auferres filias tuas a me. ³² Apud quemcumque inveneris deos tuos, non vivat! Coram fratribus nostris scrutare, quidquid tuorum apud me inveneris, et aufer". Ignorabat enim Iacob quod Rachel furata esset theraphim. ³³ Ingressus itaque Laban tabernacula Iacob et Liae et utriusque famulae, non invenit. Egressus de tentorio Liae, intravit tentorium Rachelis. ³⁴ Illa autem absconderat theraphim in stramento cameli et sedit desuper. Scrutantique omne tentorium et nihil invenienti ³⁵ ait: "Ne irascatur dominus meus, quod coram te assurgere nequeo, quia iuxta consuetudinem feminarum nunc accidit mihi". Quaesivit ergo et non invenit theraphim.

³⁶ Tumensque Iacob cum iurgio ait: "Quam ob culpam meam et ob quod peccatum meum sic persecutus es me, ³⁷ quia scrutatus es omnem supellectilem meam? Quid invenisti de cuncta substantia domus tuae? Pone hic coram fratribus meis et fratribus tuis, et iudicent inter me et te. ³⁸ Ecce, viginti annis fui tecum. Oves tuae et caprae non abortiverunt, arietes gregis tui non comedi; ³⁹ nec dilaceratum a bestia ostendi tibi: ego damnum omne reddebam; quidquid die noctuque furto perierat, a me exigebas. ⁴⁰ Die aestu consumebar et nocte gelu, fugiebatque somnus ab oculis meis. ⁴¹ Sic per viginti annos in domo tua servivi tibi: quattuordecim pro filiabus et sex pro gregibus tuis; immutasti quoque mercedem meam decem vicibus. ⁴² Nisi Deus patris mei, Deus Abraham et Timor Isaac, affuisset mihi, certemodo nudum me dimisisses; afflictionem meam et laborem manuum mearum respexit Deus et iudicavit heri".

⁴³ Respondit ei Laban: "Filiae filiae meae et filii filii mei et greges greges mei et omnia, quae cernis, mea sunt; et filiabus meis quid possum facere illis hodie et filiis earum, quos genuerunt? ⁴⁴ Veni ergo, et ineamus foedus ego et tu, ut sit in testimonium inter me et te". ⁴⁵ Tulit itaque Iacob lapidem et erexit illum in titulum; ⁴⁶ dixitque fratribus suis: "Afferte lapides". Qui congregantes fecerunt tumulum comederuntque ibi super eum. ⁴⁷ Quem vocavit Laban Iegarsahadutha (id est Tumulus testimonii), et Iacob Galed (uterque iuxta proprietatem linguae suae). ⁴⁸ Dixitque Laban: "Tumulus iste testis erit inter me et te hodie"; et idcirco appellatum est nomen eius Galed (id est Tumulus testis) ⁴⁹ et etiam Maspha (id est Specula), quia dixit: "Speculetur Dominus inter me et te, quando absconditi erimus ab invicem. ⁵⁰ Si afflixeris filias meas et si introduxeris uxores alias super eas, cum nemo nobiscum sit, vide, Deus est testis inter me et te". ⁵¹ Dixitque Laban ad Iacob: "En tumulus hic et lapis, quem erexi inter me et te. ⁵² Testis erit tumulus iste et lapis quod ego non transibo tumulum hunc pergens ad te, neque tu transibis tumulum hunc et lapidem hunc ad malum. ⁵³ Deus Abraham et Deus Nachor iudicent inter nos". Iuravit Iacob per Timorem patris sui Isaac; ⁵⁴ immolatisque victimis in monte, vocavit fratres suos, ut ederent panem. Qui cum comedissent, pernoctaverunt in monte. ⁵⁵ [32:1] Laban vero de nocte consur gens osculatus est filios et fi lias suas et benedixit illis reversusque est in locum suum.