Read the Bible

¹ Orta autem fame super terram post eam sterilitatem, quae acciderat in diebus Abraham, abiit Isaac ad Abimelech regem Philisthim in Gerara. ² Apparuitque ei Dominus et ait: "Ne descendas in Aegyptum, sed habita in terra, quam dixero tibi, ³ et peregrinare in ea; eroque tecum et benedicam tibi. Tibi enim et semini tuo dabo universas regiones has complens iuramentum, quod spopondi Abraham patri tuo, ⁴ et multiplicabo semen tuum sicut stellas caeli daboque posteris tuis universas regiones has; et benedicentur in semine tuo omnes gentes terrae, ⁵ eo quod oboedierit Abraham voci meae et custodierit praecepta et mandata mea et iustificationes legesque servaverit".

⁶ Mansit itaque Isaac in Geraris. ⁷ Qui, cum interrogaretur a viris loci illius super uxore sua, respondit: "Soror mea est". Timuerat enim confiteri quod sibi esset sociata coniugio, reputans ne forte interficerent eum propter illius pulchritudinem. ⁸ Cumque pertransissent dies plurimi et ibidem moraretur, prospiciens Abimelech rex Philisthim per fenestram vidit eum iocantem cum Rebecca uxore sua. ⁹ Et, accersito eo, ait: "Perspicuum est quod uxor tua sit; cur mentitus es eam sororem tuam esse?". Respondit: "Timui, ne morerer propter eam". ¹⁰ Dixitque Abimelech: "Quare hoc fecisti nobis? Potuit coire quispiam de populo cum uxore tua, et induxeras super nos grande peccatum". Praecepitque omni populo dicens: ¹¹ "Qui tetigerit hominem hunc et uxorem eius, morte morietur".

¹² Sevit autem Isaac in terra illa et invenit in ipso anno centuplum; benedixitque ei Dominus. ¹³ Et locupletatus est homo et ibat proficiens atque succrescens, donec magnus vehementer effectus est; ¹⁴ habuitque possessionem ovium et armentorum et familiae plurimum. Ob haec invidentes ei Philisthim ¹⁵ omnes puteos, quos foderant servi patris illius in diebus Abraham, obstruxerunt implentes humo, ¹⁶ in tantum ut ipse Abimelech diceret ad Isaac: "Recede a nobis, quoniam potentior nostri factus es valde". ¹⁷ Et ille discedens tentoria fixit ad torrentem Gerarae habitavitque ibi. ¹⁸ Rursum fodit puteos, quos foderant in diebus patris sui Abraham et quos, illo mortuo, obstruxerant Philisthim. Appellavitque eos eisdem nominibus, quibus ante pater vocaverat. ¹⁹ Foderunt servi Isaac in torrente et reppererunt ibi puteum aquae vivae. ²⁰ Sed et ibi iurgium fuit pastorum Gerarae adversus pastores Isaac dicentium: "Nostra est aqua!". Quam ob rem nomen putei vocavit Esec (id est Iurgium), quia iurgati sunt cum eo. ²¹ Foderunt autem et alium puteum, et pro illo quoque rixati sunt; appellavitque eum Sitna (id est Inimicitias). ²² Profectus inde fodit alium puteum, pro quo non contenderunt; itaque vocavit nomen eius Rehoboth (id est Latitudinem) dicens: "Nunc dilatavit nos Dominus, et crescemus in terra". ²³ Ascendit autem ex illo loco in Bersabee, ²⁴ ubi apparuit ei Dominus in ipsa nocte dicens: "Ego sum Deus Abraham patris tui. Noli timere, quia tecum sum; benedicam tibi et multiplicabo semen tuum propter servum meum Abraham". ²⁵ Itaque aedificavit ibi altare et, invocato nomine Domini, extendit tabernaculum, et servi Isaac foderunt ibi puteum.

²⁶ Abimelech autem venit ad eum de Geraris et Ochozath amicus illius et Phicol dux militum, ²⁷ et locutus est eis Isaac: "Quid venistis ad me hominem, quem odistis et expulistis a vobis?". ²⁸ Qui responderunt: "Vidimus tecum esse Dominum et idcirco diximus: Sit iuramentum inter nos et te, et ineamus tecum foedus, ²⁹ ut non facias nobis quidquam mali, sicut et nos non attigimus te et nihil fecimus tibi nisi bonum et cum pace dimisimus te. Tu es enim benedictus Domini". ³⁰ Fecit ergo eis convivium, et comederunt et biberunt. ³¹ Surgentesque mane iuraverunt sibi mutuo. Dimisitque eos Isaac, et profecti sunt ab eo cum pace. ³² Ecce autem venerunt in ipso die servi Isaac annuntiantes ei de puteo, quem foderant, atque dicentes: "Invenimus aquam". ³³ Unde appellavit eum Sabee (quod significat Abundantiam); et nomen urbi impositum est Bersabee usque in praesentem diem.

³⁴ Esau vero quadragenarius duxit uxores Iudith filiam Beeri Hetthaei et Basemath filiam Elon Hetthaei. ³⁵ Quae ambae offenderant animum Isaac et Rebeccae.