Read the Bible

¹ Postquam Abram nonaginta et novem annorum factus est, apparuit ei Dominus dixitque ad eum: "Ego Deus omnipotens, ambula coram me et esto perfectus. ² Ponamque foedus meum inter me et te et multiplicabo te vehementer nimis". ³ Cecidit Abram pronus in faciem.

⁴ Dixitque ei Deus: "Ecce pactum meum tecum. Erisque pater multarum gentium, ⁵ nec ultra vocabitur nomen tuum Abram, sed Abraham erit nomen tuum, quia patrem multarum gentium constitui te. ⁶ Faciamque te crescere vehementissime et ponam te in gentes; regesque ex te egredientur.

⁷ Et statuam pactum meum inter me et te et inter semen tuum post te in generationibus suis foedere sempiterno, ut sim Deus tuus et seminis tui post te. ⁸ Daboque tibi et semini tuo post te terram peregrinationis tuae, omnem terram Chanaan in possessionem aeternam; eroque Deus eorum". ⁹ Dixit iterum Deus ad Abraham: "Tu autem pactum meum custodies, et semen tuum post te in generationibus suis. ¹⁰ Hoc est pactum meum, quod observabitis, inter me et vos et semen tuum post te. Circumcidetur ex vobis omne masculinum, ¹¹ et circumcidetis carnem praeputii vestri, ut sit in signum foederis inter me et vos. ¹² Infans octo dierum circumcidetur in vobis: omne masculinum in generationibus vestris, tam vernaculus quam empticius ex omnibus alienigenis, quicumque non fuerit de stirpe vestra. ¹³ Circumcidetur vernaculus et empticius, eritque pactum meum in carne vestra in foedus aeternum. ¹⁴ Masculus, cuius praeputii caro circumcisa non fuerit, delebitur anima illa de populo suo; pactum meum irritum fecit".

¹⁵ Dixit quoque Deus ad Abraham: "Sarai uxorem tuam non vocabis nomen eius Sarai, sed Sara erit nomen eius. ¹⁶ Et benedicam ei; et ex illa quoque dabo tibi filium. Benedicturus sum eam, eritque in nationes; reges populorum orientur ex ea". ¹⁷ Cecidit Abraham in faciem suam et risit dicens in corde suo: "Putasne centenario nascetur filius? Et Sara nonagenaria pariet?". ¹⁸ Dixitque ad Deum: "Utinam Ismael vivat coram te". ¹⁹ Et ait Deus: "Sara uxor tua pariet tibi filium, vocabisque nomen eius Isaac; et constituam pactum meum illi in foedus sempiternum et semini eius post eum. ²⁰ Super Ismael quoque exaudivi te: ecce benedicam ei et crescere faciam et multiplicabo eum vehementissime; duodecim duces generabit, et faciam illum in gentem magnam. ²¹ Pactum vero meum statuam ad Isaac, quem pariet tibi Sara tempore isto in anno altero". ²² Cumque cessasset loqui cum eo, ascendit Deus ab Abraham.

²³ Tulit ergo Abraham Ismael filium suum et omnes vernaculos domus suae universosque, quos emerat: cunctos mares ex omnibus viris domus suae; et circumcidit carnem praeputii eorum statim in ipsa die, sicut praeceperat ei Deus. ²⁴ Abraham nonaginta novem erat annorum, quando circumcisus est in carne praeputii sui; ²⁵ et Ismael filius eius tredecim annos impleverat tempore circumcisionis suae. ²⁶ Eadem die circumcisus est Abraham et Ismael filius eius; ²⁷ et omnes viri domus illius, tam vernaculi quam empticii ex alienigenis, circumcisi sunt cum eo.