Read the Bible

¹ Et conveniunt ad eum pharisæi, et quidam de scribis, venientes ab Jerosolymis.² Et cum vidissent quosdam ex discipulis ejus communibus manibus, id est non lotis, manducare panes, vituperaverunt.³ Pharisæi enim, et omnes Judæi, nisi crebro laverint manus, non manducant, tenentes traditionem seniorum:⁴ et a foro nisi baptizentur, non comedunt: et alia multa sunt, quæ tradita sunt illis servare, baptismata calicum, et urceorum, et æramentorum, et lectorum:⁵ et interrogabant eum pharisæi et scribæ: Quare discipuli tui non ambulant juxta traditionem seniorum, sed communibus manibus manducant panem?⁶ At ille respondens, dixit eis: Bene prophetavit Isaias de vobis hypocritis, sicut scriptum est: [Populus hic labiis me honorat,
cor autem eorum longe est a me:
⁷ in vanum autem me colunt,
docentes doctrinas, et præcepta hominum.]⁸ Relinquentes enim mandatum Dei, tenetis traditionem hominum, baptismata urceorum et calicum: et alia similia his facitis multa.⁹ Et dicebat illis: Bene irritum facitis præceptum Dei, ut traditionem vestram servetis.¹⁰ Moyses enim dixit: Honora patrem tuum, et matrem tuam. Et: Qui maledixerit patri, vel matri, morte moriatur.¹¹ Vos autem dicitis: Si dixerit homo patri, aut matri, Corban (quod est donum) quodcumque ex me, tibi profuerit:¹² et ultra non dimittitis eum quidquam facere patri suo, aut matri,¹³ rescindentes verbum Dei per traditionem vestram, quam tradidistis: et similia hujusmodi multa facitis.
¹⁴ Et advocans iterum turbam, dicebat illis: Audite me omnes, et intelligite.¹⁵ Nihil est extra hominem introiens in eum, quod possit eum coinquinare, sed quæ de homine procedunt illa sunt quæ communicant hominem.¹⁶ Si quis habet aures audiendi, audiat.¹⁷ Et cum introisset in domum a turba, interrogabant eum discipuli ejus parabolam.¹⁸ Et ait illis: Sic et vos imprudentes estis? Non intelligitis quia omne extrinsecus introiens in hominem, non potest eum communicare:¹⁹ quia non intrat in cor ejus, sed in ventrum vadit, et in secessum exit, purgans omnes escas?²⁰ Dicebat autem, quoniam quæ de homine exeunt, illa communicant hominem.²¹ Ab intus enim de corde hominum malæ cogitationes procedunt, adulteria, fornicationes, homicidia,²² furta, avaritiæ, nequitiæ, dolus, impudicitiæ, oculus malus, blasphemia, superbia, stultitia.²³ Omnia hæc mala ab intus procedunt, et communicant hominem.

²⁴ Et inde surgens abiit in fines Tyri et Sidonis: et ingressus domum, neminem voluit scire, et non potuit latere.²⁵ Mulier enim statim ut audivit de eo, cujus filia habebat spiritum immundum, intravit, et procidit ad pedes ejus.²⁶ Erat enim mulier gentilis, Syrophœnissa genere. Et rogabat eum ut dæmonium ejiceret de filia ejus.²⁷ Qui dixit illi: Sine prius saturari filios: non est enim bonum sumere panem filiorum, et mittere canibus.²⁸ At illa respondit, et dixit illi: Utique Domine, nam et catelli comedunt sub mensa de micis puerorum.²⁹ Et ait illi: Propter hunc sermonem vade: exiit dæmonium a filia tua.³⁰ Et cum abiisset domum suam, invenit puellam jacentem supra lectum, et dæmonium exiisse.

³¹ Et iterum exiens de finibus Tyri, venit per Sidonem ad mare Galilææ inter medios fines Decapoleos.³² Et adducunt ei surdum, et mutum, et deprecabantur eum, ut imponat illi manum.³³ Et apprehendens eum de turba seorsum, misit digitos suos in auriculas ejus: et exspuens, tetigit linguam ejus:³⁴ et suscipiens in cælum, ingemuit, et ait illi: Ephphetha, quod est, Adaperire.³⁵ Et statim apertæ sunt aures ejus, et solutum est vinculum linguæ ejus, et loquebatur recte.³⁶ Et præcepit illis ne cui dicerent. Quanto autem eis præcipiebat, tanto magis plus prædicabant:³⁷ et eo amplius admirabantur, dicentes: Bene omnia fecit: et surdos fecit audire, et mutos loqui.