Read the Bible

¹ Hæc est benedictio, qua benedixit Moyses, homo Dei, filiis Israël ante mortem suam.² Et ait: [Dominus de Sinai venit,
et de Seir ortus est nobis:
apparuit de monte Pharan,
et cum eo sanctorum millia.
In dextera ejus ignea lex.
³ Dilexit populos,
omnes sancti in manu illius sunt:
et qui appropinquant pedibus ejus,
accipient de doctrina illius.
⁴ Legem præcepit nobis Moyses,
hæreditatem multitudinis Jacob.
⁵ Erit apud rectissimum rex,
congregatis principibus populi cum tribubus Israël.

⁶ Vivat Ruben, et non moriatur,
et sit parvus in numero.]⁷ Hæc est Judæ benedictio: [Audi, Domine, vocem Judæ,
et ad populum suum introduc eum:
manus ejus pugnabunt pro eo,
et adjutor illius contra adversarios ejus erit.]

⁸ Levi quoque ait: [Perfectio tua, et doctrina tua viro sancto tuo,
quem probasti in tentatione,
et judicasti ad aquas contradictionis.
⁹ Qui dixit patri suo et matri suæ: Nescio vos:
et fratribus suis: Ignoro vos:
et nescierunt filios suos.
Hi custodierunt eloquium tuum,
et pactum tuum servaverunt.
¹⁰ Judicia tua, o Jacob,
et legem tuam, o Israël:
ponent thymiama in furore tuo,
et holocaustum super altare tuum.
¹¹ Benedic, Domine, fortitudini ejus:
et opera manuum illius suscipe.
Percute dorsa inimicorum ejus:
et qui oderunt eum, non consurgant.]

¹² Et Benjamin ait: [Amantissimus Domini habitabit confidenter in eo:
quasi in thalamo tota die morabitur,
et inter humeros illius requiescet.]¹³ Joseph quoque ait: [De benedictione Domini terra ejus,
de pomis cæli, et rore, atque abysso subjacente.
¹⁴ De pomis fructuum solis ac lunæ,
¹⁵ de vertice antiquorum montium,
de pomis collium æternorum:
¹⁶ et de frugibus terræ, et de plenitudine ejus.
Benedictio illius qui apparuit in rubo,
veniat super caput Joseph,
et super verticem nazaræi inter fratres suos.
¹⁷ Quasi primogeniti tauri pulchritudo ejus,
cornua rhinocerotis cornua illius:
in ipsis ventilabit gentes usque ad terminos terræ.
Hæ sunt multitudines Ephraim:
et hæc millia Manasse.]

¹⁸ Et Zabulon ait: [Lætare, Zabulon, in exitu tuo,
et Issachar in tabernaculis tuis.
¹⁹ Populos vocabunt ad montem:
ibi immolabunt victimas justitiæ.
Qui inundationem maris quasi lac sugent,
et thesauros absconditos arenarum.]²⁰ Et Gad ait: [Benedictus in latitudine Gad:
quasi leo requievit,
cepitque brachium et verticem.
²¹ Et vidit principatum suum,
quod in parte sua doctor esset repositus:
qui fuit cum principibus populi,
et fecit justitias Domini,
et judicium suum cum Israël.]

²² Dan quoque ait: [Dan catulus leonis, fluet largiter de Basan.]²³ Et Nephthali dixit: [Nephthali abundantia perfruetur,
et plenus erit benedictionibus Domini:
mare et meridiem possidebit.]²⁴ Aser quoque ait: [Benedictus in filiis Aser,
sit placens fratribus suis,
et tingat in oleo pedem suum:
²⁵ ferrum et æs calceamentum ejus.
Sicut dies juventutis tuæ, ita et senectus tua.

²⁶ Non est deus alius ut Deus rectissimi,
ascensor cæli, auxiliator tuus.
Magnificentia ejus discurrunt nubes,
²⁷ habitaculum ejus sursum,
et subter brachia sempiterna
ejiciet a facie tua inimicum,
dicetque: Conterere.
²⁸ Habitabit Israël confidenter, et solus.
Oculus Jacob in terra frumenti et vini,
cælique caligabunt rore.
²⁹ Beatus es tu, Israël:
quis similis tui, popule, qui salvaris in Domino?
Scutum auxilii tui,
et gladius gloriæ tuæ:
negabunt te inimici tui,
et tu eorum colla calcabis.]