Read the Bible

¹ In finem, in carminibus. Intellectus David.² Exaudi, Deus, orationem meam, et ne despexeris deprecationem meam ;³ intende mihi, et exaudi me. Contristatus sum in exercitatione mea ; et conturbatus sum

⁴ a voce inimici, et a tribulatione peccatoris. Quoniam declinaverunt in me iniquitates, et in ira molesti erant mihi.⁵ Cor meum conturbatum est in me, et formido mortis cecidit super me.⁶ Timor et tremor venerunt super me, et contexerunt me tenebræ.⁷ Et dixi : Quis dabit mihi pennas sicut columbæ, et volabo, et requiescam ?