Read the Bible

¹ Deus, Deus meus, respice in me : quare me dereliquisti ? Longe a salute mea verba delictorum meorum.

² Deus meus, clamabo per diem, et non exaudies ; et nocte, et non ad insipientiam mihi.

³ Tu autem in sancto habitas, laus Israël.

⁴ In te speraverunt patres nostri ; speraverunt, et liberasti eos.

⁵ Ad te clamaverunt, et salvi facti sunt ; in te speraverunt, et non sunt confusi.

⁶ Ego autem sum vermis, et non homo ; opprobrium hominum, et abjectio plebis.

⁷ Omnes videntes me deriserunt me ; locuti sunt labiis, et moverunt caput.

⁸ Speravit in Domino, eripiat eum : salvum faciat eum, quoniam vult eum.

⁹ Quoniam tu es qui extraxisti me de ventre, spes mea ab uberibus matris meæ.

¹⁰ In te projectus sum ex utero ; de ventre matris meæ Deus meus es tu ;

¹¹ ne discesseris a me, quoniam tribulatio proxima est, quoniam non est qui adjuvet.

¹² Circumdederunt me vituli multi ; tauri pingues obsederunt me.

¹³ Aperuerunt super me os suum, sicut leo rapiens et rugiens.

¹⁴ Sicut aqua effusus sum ; et dispersa sunt omnia ossa mea. Factum est cor meum tamquam cera liquescens in medio ventris mei.

¹⁵ Aruit tamquam testa virtus mea, et lingua mea adhæsit faucibus meis, et in pulverem mortis deduxisti me.

¹⁶ Quoniam circumdederunt me canes multi ; concilium malignantium obsedit me. Foderunt manus meas et pedes meos,

¹⁷ dinumeraverunt omnia ossa mea. Ipsi vero consideraverunt et inspexerunt me.¹⁸ Diviserunt sibi vestimenta mea, et super vestem meam miserunt sortem.¹⁹ Tu autem, Domine, ne elongaveris auxilium tuum a me ; ad defensionem meam conspice.²⁰ Erue a framea, Deus, animam meam, et de manu canis unicam meam.²¹ Salva me ex ore leonis, et a cornibus unicornium humilitatem meam.

²² Narrabo nomen tuum fratribus meis ; in medio ecclesiæ laudabo te.²³ Qui timetis Dominum, laudate eum ; universum semen Jacob, glorificate eum.

²⁴ Timeat eum omne semen Israël, quoniam non sprevit, neque despexit deprecationem pauperis ; nec avertit faciem suam a me : et cum clamarem ad eum exaudivit me.²⁵ Apud te laus mea in ecclesia magna ; vota mea reddam in conspectu timentium eum.

²⁶ Edent pauperes, et saturabuntur ; et laudabunt Dominum qui requirunt eum ; vivent corda eorum in sæculum sæculi.²⁷ Reminiscentur et convertentur ad Dominum universi fines terræ ; et adorabunt in conspectu ejus universæ familiæ gentium ;

²⁸ quoniam Domini est regnum, et ipse dominabitur gentium.

²⁹ Manducaverunt et adoraverunt omnes pingues terræ ; in conspectu ejus cadent omnes qui descendunt in terram.