Read the Bible

¹ The title of the nynthe salm. In to the ende, for the pryuytees of the sone, the salm of Dauid. Lord, Y schal knouleche to thee in al myn herte; Y schal telle alle thi merueils.² Thou hiyeste, Y schal be glad, and Y schal be fulli ioieful in thee; Y schal synge to thi name.³ For thou turnest myn enemy abac; thei schulen be maad feble, and schulen perische fro thi face.⁴ For thou hast maad my doom and my cause; thou, that demest riytfulnesse, `hast set on the trone.<sup>5</sup> Thou blamedist hethene men, and the wickid perischide; thou hast do awei the name of hem in to the world, and in to the world of world.<sup>6</sup> The swerdis of the enemy failiden in to the ende; and thou hast distried the citees of hem. The mynde of hem perischide with sown;<sup>7</sup> and the Lord dwellith with outen ende. He made redi his trone in doom; and he schal deme the world in equite,<sup>8</sup> he schal deme puplis in riytfulnesse.<sup>9</sup> And the Lord is maad refuyt, `ether help, `to a pore man; an helpere in couenable tymes in tribulacioun.¹⁰ And thei, that knowen thi name, haue hope in thee; for thou, Lord, hast not forsake hem that seken thee.

¹¹ Synge ye to the Lord, that dwellith in Syon; telle ye hise studyes among hethene men.¹² God foryetith not the cry of pore men; for he hath mynde, and sekith the blood of hem.¹³ Lord, haue thou merci on me; se thou my mekenesse of myn enemyes.¹⁴ Which enhaunsist me fro the yatis of deeth; that Y telle alle thi preisyngis in the yatis of the douyter of Syon.¹⁵ Y schal `be fulli ioyeful in thin helthe; hethene men ben fast set in the perisching, which thei maden. In this snare, which thei hidden, the foot of hem is kauyt.¹⁶ The Lord makynge domes schal be knowun; the synnere is takun in the werkis of hise hondis.¹⁷ Synneris be turned togidere in to helle; alle folkis, that foryeten God.¹⁸ For the foryetyng of a pore man schal not be in to the ende; the pacience of pore men schal not perische in to the ende.¹⁹ Lord, rise thou vp, a man be not coumfortid; folkis be demyd in thi siyt.²⁰ Lord, ordeine thou a lawe makere on hem; wite folkis, that thei ben men.