Read the Bible

¹ The title of the seuene and fourtithe salm. The song of salm, of the sones of Chore. The Lord is greet, and worthi to be preisid ful myche; in the citee of oure God, in the hooli hil of hym.² It is foundid in the ful out ioiyng of al erthe; the hil of Syon; the sidis of the north, the citee of the greet kyng.³ God schal be knowun in the housis therof; whanne he schal take it.⁴ For lo! the kyngis of erthe weren gaderid togidere; thei camen into o place.⁵ Thei seynge so wondriden; thei weren disturblid, thei weren mouyd togidere, tremblyng took hem.⁶ There sorewis as of a womman trauelynge of child;⁷ in a greet spirit thou schalt al to-breke the schippis of Tharsis.

⁸ As we herden, so we sien, in the citee of the Lord of vertues, in the citee of oure God; God hath foundid that citee with outen ende.⁹ God, we han resseyued thi mercy; in the myddis of thi temple.¹⁰ Aftir thi name, God, so thin heriyng is spred abrood in to the endis of erthe; thi riyt hond is ful of riytfulnesse.¹¹ The hil of Sion be glad, and the douytris of Judee be fulli ioiful; for thi domes, Lord.¹² Cumpasse ye Syon, and biclippe ye it; telle ye in the touris therof.¹³ Sette ye youre hertis in the vertu of him; and departe ye the housis of hym, that ye telle out in an other generacioun.¹⁴ For this is God, oure God, in to withouten ende, and in to the world of world; he schal gouerne vs in to worldis.