Read the Bible

¹ The title of the sixte and fourtithe salm. To victorie, a salm to the sones of Chore. Alle ye folkis, make ioie with hondis; synge ye hertli to God in the vois of ful out ioiyng.² For the Lord is hiy and ferdful; a greet kyng on al erthe.³ He made puplis suget to vs; and hethene men vndur oure feet.⁴ He chees his eritage to vs; the fairnesse of Jacob, whom he louyde.

⁵ God stiede in hertli song; and the Lord in the vois of a trumpe.⁶ Synge ye to oure God, synge ye; synge ye to oure kyng, synge ye.⁷ For God is kyng of al erthe; synge ye wiseli.⁸ God schal regne on hethene men; God sittith on his hooli seete.⁹ The princes of puplis ben gaderid togidere with God of Abraham; for the stronge goddis of erthe ben reisid greetli.