Read the Bible

¹ The titil of the hundrid and fourtenthe salm. Alleluia. I louede `the Lord; for the Lord schal here the vois of my preier.² For he bowide doun his eere to me; and Y schal inwardli clepe in my daies.³ The sorewis of deth cumpassiden me; and the perelis of helle founden me.⁴ I foond tribulacioun and sorewe; and Y clepide inwardli the name of the Lord. Thou, Lord, delyuere my soule;⁵ the Lord is merciful, and iust; and oure God doith merci.⁶ And the Lord kepith litle children; Y was mekid, and he delyuerede me.⁷ Mi soule, turne thou in to thi reste; for the Lord hath do wel to thee.⁸ For he hath delyuered my soule fro deth; myn iyen fro wepingis, my feet fro fallyng doun.⁹ I schal plese the Lord; in the cuntrei of hem that lyuen.

¹⁰ I bileuede, for which thing Y spak; forsoth Y was maad low ful myche.¹¹ I seide in my passing; Ech man is a lier.¹² What schal Y yelde to the Lord; for alle thingis which he yeldide to me?¹³ I schal take the cuppe of heelthe; and Y schal inwardli clepe the name of the Lord.¹⁴ I schal yelde my vowis to the Lord bifor al his puple;¹⁵ the deth of seyntis of the Lord is precious in his siyt.¹⁶ O! Lord, for Y am thi seruant; Y am thi seruaunt, and the sone of thi handmaide. Thou hast broke my bondys,¹⁷ to thee Y schal offre a sacrifice of heriyng; and Y schal inwardli clepe the name of the Lord.¹⁸ I schal yelde my vowis to the Lord, in the siyt of al his puple;¹⁹ in the porchis of the hous of the Lord, in the myddil of thee, Jerusalem.