Read the Bible

¹ Lord, not to vs, not to vs; but yyue thou glorie to thi name.² On thi merci and thi treuthe; lest ony tyme hethene men seien, Where is the God of hem?³ Forsothe oure God in heuene; dide alle thingis, whiche euere he wolde.⁴ The symulacris of hethene men ben siluer and gold; the werkis of mennus hondis.⁵ Tho han mouth, and schulen not speke; tho han iyen, and schulen not se.⁶ Tho han eeris, and schulen not here; tho han nose thurls, and schulen not smelle.⁷ Tho han hondis, and schulen not grope; tho han feet, and schulen not go; tho schulen not crye in her throte.⁸ Thei that maken tho ben maad lijk tho; and alle that triste in tho.

⁹ The hous of Israel hopide in the Lord; he is the helpere `of hem, and the defendere of hem.<sup>10</sup> The hous of Aaron hopide in the Lord; he is the helpere of hem, and the defendere of hem.<sup>11</sup> Thei that dreden the Lord, hopiden in the Lord; he is the helpere of hem, and the defendere of hem.<sup>12</sup> The Lord was myndeful of vs; and blesside vs. He blesside the hous of Israel; he blesside the hous of Aaron.<sup>13</sup> He blesside alle men that dreden the Lord; `he blesside litle `men with the grettere.<sup>14</sup> The Lord encreesse on you; on you and on youre sones.<sup>15</sup> Blessid be ye of the Lord; that made heuene and erthe.<sup>16</sup> Heuene of `heuene is to the Lord; but he yaf erthe to the sones of men.¹⁷ Lord, not deed men schulen herie thee; nether alle men that goen doun in to helle.¹⁸ But we that lyuen, blessen the Lord; fro this tyme now and til in to the world.