Read the Bible

¹ Quis mihi det te fratrem meum, sugentem ubera matris meae, ut inveniam te foris et deosculer te, et iam me nemo despiciat? ² Apprehenderem te et ducerem in domum matris meae; ibi me doceres, et darem tibi poculum ex vino condito et mustum malorum granatorum meorum. ³ Laeva eius sub capite meo, et dextera illius amplexatur me. ⁴ Adiuro vos, filiae Ierusalem, ne suscitetis neque evigilare faciatis dilectam, donec ipsa velit.

⁵ Quae est ista, quae ascendit de deserto innixa super dilectum suum? Sub arbore malo suscitavi te; ibi parturivit te mater tua, ibi parturivit te genetrix tua. ⁶ Pone me ut signaculum super cor tuum, ut signaculum super brachium tuum, quia fortis est ut mors dilectio, dura sicut infernus aemulatio; lampades eius lampades ignis atque flammae divinae. ⁷ Aquae multae non potuerunt exstinguere caritatem, nec flumina obruent illam; si dederit homo omnem substantiam domus suae pro dilectione, quasi nihil despicient eum.

⁸ Soror nostra parva et ubera non habet; quid faciemus sorori nostrae in die, quando alloquenda est? ⁹ Si murus est, aedificemus super eum propugnacula argentea; si ostium est, compingamus illud tabulis cedrinis. ¹⁰ Ego murus, et ubera mea sicut turris; ex quo facta sum coram eo quasi pacem reperiens. ¹¹ Vinea fuit Salomoni in Baalhamon. Tradidit eam custodibus; vir affert pro fructu eius mille argenteos. ¹² Vinea mea coram me est; mille tibi, Salomon, et ducenti his, qui custodiunt fructus eius.

¹³ Quae habitas in hortis, amici auscultant, fac me audire vocem tuam. ¹⁴ Fuge, dilecte mi, et assimilare capreae hinnuloque cervorum super montes aromatum.