Read the Bible

¹ Canticum Canticorum Salomonis.

² Osculetur me osculo oris sui! Nam meliores sunt amores tui vino: ³ in fragrantiam unguentorum tuorum optimorum. Oleum effusum nomen tuum; ideo adulescentulae dilexerunt te. ⁴ Trahe me post te. Curramus! Introducat me rex in cellaria sua; exsultemus et laetemur in te memores amorum tuorum super vinum; recte diligunt te. ⁵ Nigra sum sed formosa, filiae Ierusalem, sicut tabernacula Cedar, sicut pelles Salma. ⁶ Nolite me considerare quod fusca sim, quia decoloravit me sol. Filii matris meae irati sunt mihi; posuerunt me custodem in vineis, vineam meam non custodivi.

⁷ Indica mihi, tu, quem diligit anima mea, ubi pascas, ubi cubes in meridie, ne vagari incipiam post greges sodalium tuorum. ⁸ Si ignoras, o pulcherrima inter mulieres, egredere et abi post vestigia gregum et pasce haedos tuos iuxta tabernacula pastorum. ⁹ Equae in curribus pharaonis assimilavi te, amica mea. ¹⁰ Pulchrae sunt genae tuae inter inaures, collum tuum inter monilia. ¹¹ Inaures aureas faciemus tibi vermiculatas argento.

¹² Dum esset rex in accubitu suo, nardus mea dedit odorem suum. ¹³ Fasciculus myrrhae dilectus meus mihi, qui inter ubera mea commoratur. ¹⁴ Botrus cypri dilectus meus mihi in vineis Engaddi. ¹⁵ Ecce tu pulchra es, amica mea, ecce tu pulchra es: oculi tui columbarum. ¹⁶ Ecce tu pulcher es, dilecte mi, et decorus. Lectulus noster floridus, ¹⁷ tigna domorum nostrarum cedrina, laquearia nostra cupressina.