Read the Bible

¹ Debemus autem nos fir miores imbecillitates infir morum sustinere et non nobis placere. ² Unusquisque nostrum proximo placeat in bonum ad aedificationem; ³ etenim Christus non sibi placuit, sed sicut scriptum est: "Improperia improperantium tibi ceciderunt super me". ⁴ Quaecumque enim antea scripta sunt, ad nostram doctrinam scripta sunt, ut per patientiam et consolationem Scripturarum spem habeamus.

⁵ Deus autem patientiae et solacii det vobis idipsum sapere in alterutrum secundum Christum Iesum, ⁶ ut unanimes uno ore glorificetis Deum et Patrem Domini nostri Iesu Christi.

⁷ Propter quod suscipite invicem, sicut et Christus suscepit vos, in gloriam Dei. ⁸ Dico enim Christum ministrum fuisse circumcisionis propter veritatem Dei ad confirmandas promissiones patrum; ⁹ gentes autem propter misericordiam glorificare Deum, sicut scriptum est: "Propter hoc confitebor tibi in gentibus et nomini tuo cantabo". ¹⁰ Et iterum dicit: "Laetamini, gentes, cum plebe eius". ¹¹ Et iterum: "Laudate, omnes gentes, Dominum, et magnificent eum omnes populi". ¹² Et rursus Isaias ait: "Erit radix Iesse, et qui exsurget regere gentes: in eo gentes sperabunt".

¹³ Deus autem spei repleat vos omni gaudio et pace in credendo, ut abundetis in spe in virtute Spiritus Sancti.

¹⁴ Certus sum autem, fratres mei, et ego ipse de vobis, quoniam et ipsi pleni estis bonitate, repleti omni scientia, ita ut possitis et alterutrum monere. ¹⁵ Audacius autem scripsi vobis ex parte, tamquam in memoriam vos reducens propter gratiam, quae data est mihi a Deo, ¹⁶ ut sim minister Christi Iesu ad gentes, consecrans evangelium Dei, ut fiat oblatio gentium accepta, sanctificata in Spiritu Sancto.

¹⁷ Habeo igitur gloriationem in Christo Iesu ad Deum; ¹⁸ non enim audebo aliquid loqui eorum, quae per me non effecit Christus in oboedientiam gentium, verbo et factis, ¹⁹ in virtute signorum et prodigiorum, in virtute Spiritus, ita ut ab Ierusalem et per circuitum usque in Illyricum repleverim evangelium Christi, ²⁰ sic autem contendens praedicare evangelium, non ubi nominatus est Christus, ne super alienum fundamentum aedificarem, ²¹ sed sicut scriptum est: "Quibus non est annuntiatum de eo, videbunt; et, qui non audierunt, intellegent".

²² Propter quod et impediebar plurimum venire ad vos; ²³ nunc vero ulterius locum non habens in his regionibus, cupiditatem autem habens veniendi ad vos ex multis iam annis, ²⁴ cum in Hispaniam proficisci coepero, spero enim quod praeteriens videam vos et a vobis deducar illuc, si vobis primum ex parte fruitus fuero. ²⁵ Nunc autem proficiscor in Ierusalem ministrare sanctis; ²⁶ probaverunt enim Macedonia et Achaia communicationem aliquam facere in pauperes sanctorum, qui sunt in Ierusalem. ²⁷ Placuit enim eis, et debitores sunt eorum; nam si spiritalibus eorum communicaverunt gentes, debent et in carnalibus ministrare eis. ²⁸ Hoc igitur cum consummavero et assignavero eis fructum hunc, proficiscar per vos in Hispaniam; ²⁹ scio autem quoniam veniens ad vos, in abundantia benedictionis Christi veniam.

³⁰ Obsecro autem vos, fratres, per Dominum nostrum Iesum Christum et per caritatem Spiritus, ut concertemini mecum in orationibus pro me ad Deum, ³¹ ut liberer ab infidelibus, qui sunt in Iudaea, et ministerium meum pro Ierusalem acceptum sit sanctis, ³² ut veniens ad vos in gaudio per voluntatem Dei refrigerer vobiscum. ³³ Deus autem pacis sit cum omnibus vobis. Amen.