Read the Bible

¹ Et vidi caelum novum et ter ram novam; primum enim caelum et prima terra abierunt, et mare iam non est. ² Et civitatem sanctam Ierusalem novam vidi descendentem de caelo a Deo, paratam sicut sponsam ornatam viro suo. ³ Et audivi vocem magnam de throno dicentem: "Ecce tabernaculum Dei cum hominibus! Et habitabit cum eis, et ipsi populi eius erunt, et ipse Deus cum eis erit eorum Deus; ⁴ et absterget omnem lacrimam ab oculis eorum, et mors ultra non erit, neque luctus neque clamor neque dolor erit ultra, quia prima abierunt". ⁵ Et dixit, qui sedebat super throno: "Ecce nova facio omnia". Et dicit: "Scribe: Haec verba fidelia sunt et vera". ⁶ Et dixit mihi: "Facta sunt! Ego sum Alpha et Omega, principium et finis. Ego sitienti dabo de fonte aquae vivae gratis. ⁷ Qui vicerit, hereditabit haec, et ero illi Deus, et ille erit mihi filius. ⁸ Timidis autem et incredulis et exsecratis et homicidis et fornicatoribus et veneficis et idololatris et omnibus mendacibus, pars illorum erit in stagno ardenti igne et sulphure, quod est mors secunda".

⁹ Et venit unus de septem angelis habentibus septem phialas plenas septem plagis novissimis et locutus est mecum dicens: "Veni, ostendam tibi sponsam uxorem Agni". ¹⁰ Et sustulit me in spiritu super montem magnum et altum et ostendit mihi civitatem sanctam Ierusalem descendentem de caelo a Deo, ¹¹ habentem claritatem Dei; lumen eius simile lapidi pretiosissimo, tamquam lapidi iaspidi, in modum crystalli; ¹² et habebat murum magnum et altum et habebat portas duodecim et super portas angelos duodecim et nomina inscripta, quae sunt duodecim tribuum filiorum Israel. ¹³ Ab oriente portae tres, et ab aquilone portae tres, et ab austro portae tres, et ab occasu portae tres; ¹⁴ et murus civitatis habens fundamenta duodecim, et super ipsis duodecim nomina duodecim apostolorum Agni. ¹⁵ Et, qui loquebatur mecum, habebat mensuram arundinem auream, ut metiretur civitatem et portas eius et murum eius. ¹⁶ Et civitas in quadro posita est, et longitudo eius tanta est quanta et latitudo. Et mensus est civitatem arundine per stadia duodecim milia; longitudo et latitudo et altitudo eius aequales sunt. ¹⁷ Et mensus est murum eius centum quadraginta quattuor cubitorum, mensura hominis, quae est angeli. ¹⁸ Et erat structura muri eius ex iaspide, ipsa vero civitas aurum mundum simile vitro mundo. ¹⁹ Fundamenta muri civitatis omni lapide pretioso ornata: fundamentum primum iaspis, secundus sapphirus, tertius chalcedonius, quartus smaragdus, ²⁰ quintus sardonyx, sextus sardinus, septimus chrysolithus, octavus beryllus, nonus topazius, decimus chrysoprasus, undecimus hyacinthus, duodecimus amethystus. ²¹ Et duodecim portae duodecim margaritae sunt, et singulae portae erant ex singulis margaritis. Et platea civitatis aurum mundum tamquam vitrum perlucidum. ²² Et templum non vidi in ea: Dominus enim, Deus omnipotens, templum illius est, et Agnus. ²³ Et civitas non eget sole neque luna, ut luceant ei, nam claritas Dei illuminavit eam, et lucerna eius est Agnus. ²⁴ Et ambulabunt gentes per lumen eius, et reges terrae afferunt gloriam suam in illam; ²⁵ et portae eius non claudentur per diem, nox enim non erit illic; ²⁶ et afferent gloriam et divitias gentium in illam. ²⁷ Nec intrabit in ea aliquid coinquinatum et faciens abominationem et mendacium, nisi qui scripti sunt in libro vitae Agni.