Read the Bible

¹ Dominus regnavit! Commoveantur populi sedet super cherubim, moveatur terra. ² Dominus in Sion magnus et excelsus super omnes populos. ³ Confiteantur nomini tuo magno et terribili, quoniam sanctum est. ⁴ Rex potens iudicium diligit: tu statuisti, quae recta sunt, iudicium et iustitiam in Iacob tu fecisti. ⁵ Exaltate Dominum Deum nostrum et adorate ad scabellum pedum eius, quoniam sanctus est.

⁶ Moyses et Aaron in sacerdotibus eius, et Samuel inter eos, qui invocant nomen eius. Invocabant Dominum, et ipse exaudiebat eos, ⁷ in columna nubis loquebatur ad eos. Custodiebant testimonia eius et praeceptum, quod dedit illis. ⁸ Domine Deus noster, tu exaudiebas eos; Deus, tu propitius fuisti eis, ulciscens autem adinventiones eorum. ⁹ Exaltate Dominum Deum nostrum et adorate ad montem sanctum eius, quoniam sanctus Dominus Deus noster.