Read the Bible

¹ Magistro chori. Filiorum Core. PSALMUS. [85:2] Complacuisti tibi, Domine, in terra tua, convertisti captivitatem Iacob. ² [85:3] Remisisti iniquitatem plebis tuae, operuisti omnia peccata eorum. ³ [85:4] Contraxisti omnem iram tuam, revertisti a furore indignationis tuae. ⁴ [85:5] Converte nos, Deus, salutaris noster, et averte iram tuam a nobis. ⁵ [85:6] Numquid in aeternum irasceris nobis aut extendes iram tuam a generatione in generationem? ⁶ [85:7] Nonne tu conversus vivificabis nos, et plebs tua laetabitur in te? ⁷ [85:8] Ostende nobis, Domine, misericordiam tuam et salutare tuum da nobis.

⁸ [85:9] Audiam, quid loquatur Dominus Deus, quoniam loquetur pacem ad plebem suam et sanctos suos et ad eos, qui convertuntur corde. ⁹ [85:10] Vere prope timentes eum salutare ipsius, ut inhabitet gloria in terra nostra. ¹⁰ [85:11] Misericordia et veritas obviaverunt sibi, iustitia et pax osculatae sunt. ¹¹ [85:12] Veritas de terra orta est, et iustitia de caelo prospexit. ¹² [85:13] Etenim Dominus dabit benignitatem, et terra nostra dabit fructum suum. ¹³ [85:14] Iustitia ante eum ambulabit et ponet in via gressus suos.