Read the Bible

¹ Magistro chori. PSALMUS. David. [20:2] Exaudiat te Dominus in die tribulationis, protegat te nomen Dei Iacob. ² [20:3] Mittat tibi auxilium de sancto et de Sion tueatur te. ³ [20:4] Memor sit omnis sacrificii tui et holocaustum tuum pingue habeat. ⁴ [20:5] Tribuat tibi secundum cor tuum et omne consilium tuum adimpleat. ⁵ [20:6] Laetabimur in salutari tuo et in nomine Dei nostri levabimus signa; impleat Dominus omnes petitiones tuas.

⁶ [20:7] Nunc cognovi quoniam salvum fecit Dominus christum suum: exaudivit illum de caelo sancto suo, in virtutibus salutis dexterae eius. ⁷ [20:8] Hi in curribus, et hi in equis, nos autem nomen Domini Dei nostri invocavimus. ⁸ [20:9] Ipsi incurvati sunt et ceciderunt, nos autem surreximus et erecti sumus. ⁹ [20:10] Domine, salvum fac regem, et exaudi nos in die, qua invocaverimus te.