Read the Bible

¹ Miktam. David. Conserva me, Deus, quoniam speravi in te. ² Dixi Domino: "Dominus meus es tu, bonum mihi non est sine te". ³ In sanctos, qui sunt in terra, inclitos viros, omnis voluntas mea in eos. ⁴ Multiplicantur dolores eorum, qui post deos alienos acceleraverunt. Non effundam libationes eorum de sanguinibus neque assumam nomina eorum in labiis meis. ⁵ Dominus pars hereditatis meae et calicis mei: tu es qui detines sortem meam. ⁶ Funes ceciderunt mihi in praeclaris; insuper et hereditas mea speciosa est mihi. ⁷ Benedicam Dominum, qui tribuit mihi intellectum; insuper et in noctibus erudierunt me renes mei.

⁸ Proponebam Dominum in conspectu meo semper; quoniam a dextris est mihi, non commovebor. ⁹ Propter hoc laetatum est cor meum, et exsultaverunt praecordia mea; insuper et caro mea requiescet in spe. ¹⁰ Quoniam non derelinques animam meam in inferno nec dabis sanctum tuum videre corruptionem. ¹¹ Notas mihi facies vias vitae, plenitudinem laetitiae cum vultu tuo, delectationes in dextera tua usque in finem.