Read the Bible

¹ Magistro chori. PSALMUS. David. [140:2] Eripe me, Domine, ab homine malo, a viro violentiae serva me. ² [140:3] Qui cogitaverunt mala in corde, tota die constituebant proelia. ³ [140:4] Acuerunt linguas suas sicut serpentis, venenum aspidum sub labiis eorum. ⁴ [140:5] Custodi me, Domine, de manu peccatoris et a viro violentiae serva me, qui cogitaverunt supplantare gressus meos. ⁵ [140:6] Absconderunt superbi laqueum mihi et funes extenderunt in rete, iuxta iter offendicula posuerunt mihi. ⁶ [140:7] Dixi Domino: "Deus meus es tu; auribus percipe, Domine, vocem deprecationis meae". ⁷ [140:8] Domine, Domine, virtus salutis meae, obumbrasti caput meum in die belli.

⁸ [140:9] Ne concedas, Domine, desideria impii; consilia eius ne perficias. Exaltant ⁹ [140:10] caput, qui circumdant me; malitia labiorum ipsorum operiat eos. ¹⁰ [140:11] Cadant super eos carbones ignis, in foveas deicias eos, et non exsurgant. ¹¹ [140:12] Vir linguosus non firmabitur in terra, virum violentiae mala capient in interitu. ¹² [140:13] Cognovi quia faciet Dominus iudicium inopis et vindictam pauperum. ¹³ [140:14] Verumtamen iusti confitebuntur nomini tuo, et habitabunt recti in conspectu tuo.