Read the Bible

¹ Canticum. PSALMUS. David. [108:2] Paratum cor meum, Deus, paratum cor meum, cantabo et psallam. Euge, gloria mea! ² [108:3] Exsurge, psalterium et cithara, excitabo auroram. ³ [108:4] Confitebor tibi in populis, Domine, et psallam tibi in nationibus, ⁴ [108:5] quia magna est usque ad caelos misericordia tua, et usque ad nubes veritas tua. ⁵ [108:6] Exaltare super caelos, Deus, et super omnem terram gloria tua.

⁶ [108:7] Ut liberentur dilecti tui, salvum fac dextera tua et exaudi me. ⁷ [108:8] Deus locutus est in sancto suo: "Exsultabo et dividam Sichimam et convallem Succoth dimetiar; ⁸ [108:9] meus est Galaad, et meus est Manasses, et Ephraim fortitudo capitis mei, Iuda sceptrum meum. ⁹ [108:10] Moab lebes lavacri mei; super Idumaeam extendam calceamentum meum, super Philistaeam vociferabor". ¹⁰ [108:11] Quis deducet me in civitatem munitam? Quis deducet me usque in Idumaeam?. ¹¹ [108:12] Nonne, Deus, qui reppulisti nos? Et non exibis, Deus, in virtutibus nostris? ¹² [108:13] Da nobis auxilium de tribulatione, quia vana salus hominis. ¹³ [108:14] In Deo faciemus virtutem, et ipse conculcabit inimicos nostros.