Read the Bible

¹ Fili mi, custodi sermones meos et praecepta mea reconde tibi. ² Serva mandata mea et vives, et legem meam quasi pupillam oculi tui. ³ Liga ea in digitis tuis, scribe illa in tabulis cordis tui. ⁴ Dic sapientiae: "Soror mea es" et prudentiam voca Amicam, ⁵ ut custodiat te a muliere extranea et ab aliena, quae verba sua dulcia facit.

⁶ De fenestra enim domus meae per cancellos prospexi ⁷ et video inter parvulos; considero inter filios vecordem iuvenem, ⁸ qui transit per plateam iuxta angulum et prope viam domus illius graditur ⁹ in obscuro advesperascente die, in mediis tenebris et caligine. ¹⁰ Et ecce, occurrit illi mulier ornatu meretricio, cauta corde, garrula et rebellans, ¹¹ quietis impatiens nec valens in domo consistere pedibus suis: ¹² nunc foris, nunc in plateis et iuxta angulos insidians. ¹³ Apprehensumque deosculatur iuvenem et procaci vultu blanditur dicens: ¹⁴ "Victimas pro salute vovi, hodie reddidi vota mea; ¹⁵ idcirco egressa sum in occursum tuum desiderans te videre et repperi. ¹⁶ Stragulatis vestibus lectulum meum stravi, linteis pictis ex Aegypto; ¹⁷ aspersi cubile meum myrrha et aloe et cinnamomo. ¹⁸ Veni, inebriemur voluptatibus, usque mane fruamur amoribus. ¹⁹ Non est enim vir in domo sua; abiit via longissima, ²⁰ sacculum pecuniae secum tulit, in die plenae lunae reversurus est in domum suam". ²¹ Irretivit eum multis sermonibus et blanditiis labiorum protraxit illum. ²² Stultus eam sequitur quasi bos ductus ad victimam, sicut irretitur vinculo cervus, ²³ donec transfigat sagitta iecur eius; velut si avis festinet ad laqueum et nescit quod de periculo animae illius agitur.

²⁴ Nunc ergo, fili mi, audi me et attende verbis oris mei. ²⁵ Ne abstrahatur in viis illius mens tua, neque decipiaris semitis eius. ²⁶ Multos enim vulneratos deiecit, et fortissimi quique interfecti sunt ab ea: ²⁷ viae inferi domus eius penetrantes in interiora mortis.