Read the Bible

¹ Melior est pauper, qui ambulat in simplicitate sua, quam qui torquet labia et est insipiens.

² Ubi non est scientia animae, non est bonum; et, qui festinus est pedibus, offendit.

³ Stultitia hominis supplantat gressus eius, et contra Deum fervet animo suo.

⁴ Divitiae addunt amicos plurimos; pauper autem ab amico suo separatur.

⁵ Testis falsus non erit impunitus; et, qui mendacia loquitur, non effugiet.

⁶ Multi blandiuntur faciei potentis, et omnes amici sunt dona tribuenti. ⁷ Omnes fratres hominis pauperis oderunt eum, insu7per et amici procul recesserunt ab eo; qui tantum verba sectatur, nihil habebit.

⁸ Qui autem possessor est mentis, diligit animam suam, et custos prudentiae inveniet bona.

⁹ Falsus testis non erit impunitus; et, qui loquitur mendacia, peribit.

¹⁰ Non decent stultum deliciae, nec servum dominari principibus.

¹¹ Doctrina viri mitigat iram eius, et gloria eius est iniqua praetergredi.

¹² Sicut fremitus leonis ita et regis ira, et sicut ros super herbam ita et gratia eius.

¹³ Calamitas patris filius stultus; et tecta iugiter perstillantia litigiosa mulier.

¹⁴ Domus et divitiae hereditas patrum, a Domino autem uxor prudens.

¹⁵ Pigredo immittit soporem, et anima dissoluta esuriet.

¹⁶ Qui custodit mandatum, custodit animam suam; qui autem neglegit viam suam, mortificabitur.

¹⁷ Feneratur Domino, qui miseretur pauperis, et vicissitudinem suam reddet ei.

¹⁸ Erudi filium tuum, dum spes est; ad interfectionem autem eius ne ponas animam tuam.

¹⁹ Qui impatiens est, sustinebit multam; et, si eum abripere vis, aliud appones.

²⁰ Audi consilium et suscipe disciplinam, ut sis sapiens in novissimis tuis.

²¹ Multae cogitationes in corde viri, voluntas autem Domini permanebit.

²² Desiderabile in homine est misericordia eius; et melior est pauper quam vir mendax.

²³ Timor Domini ad vitam, et in plenitudine commorabitur absque visitatione mali.

²⁴ Abscondit piger manum suam in catino nec ad os suum applicat eam.

²⁵ Derisore flagellato vel parvulus sapientior erit; si autem corripueris sapientem, intelleget disciplinam.

²⁶ Qui affligit patrem et fugat matrem, filius inhonestus et ignominiosus.

²⁷ Acquiesce, fili, ut audias doctrinam nec erres a sermonibus scientiae.

²⁸ Testis iniquus deridet iudicium, et os impiorum devorat iniquitatem.

²⁹ Paratae sunt derisoribus virgae, et plagae stultorum corporibus.