Read the Bible

¹ Sapientia mulierum aedificat domum suam, insipientia eam manibus destruet.

² Ambulans recto itinere timet Deum; despicit illum, qui infami graditur via.

³ In ore stulti virga superbiae, labia autem sapientium custodiunt eos.

⁴ Ubi non sunt boves, praesepe vacuum est; plurimae autem segetes in fortitudine bovis.

⁵ Testis fidelis non mentitur, profert autem mendacium dolosus testis.

⁶ Quaerit derisor sapientiam et non invenit; doctrina prudentibus facilis.

⁷ Cede coram viro stulto, quia nescies labia prudentiae.

⁸ Sapientia callidi est intellegere viam suam, et imprudentia stultorum errans.

⁹ Stulti parvipendent peccatum, et inter iustos morabitur gratia.

¹⁰ Cor novit amaritudinem animae suae, in gaudio eius non miscebitur extraneus.

¹¹ Domus impiorum delebitur, tabernacula vero iustorum germinabunt.

¹² Est via, quae videtur homini recta, novissima autem eius deducunt ad mortem.

¹³ Etiam in risu cor dolore miscebitur, et extrema gaudii luctus occupat.

¹⁴ Viis suis replebitur stultus, et super eum erit vir bonus.

¹⁵ Simplex credit omni verbo, astutus considerat gressus suos.

¹⁶ Sapiens timet et declinat a malo, stultus transilit et confidit.

¹⁷ Impatiens operabitur stultitiam, et vir versutus odiosus est.

¹⁸ Possidebunt simplices stultitiam, et astuti coronabuntur scientia.

¹⁹ Procumbunt mali ante bonos, et impii ante portas iustorum.

²⁰ Etiam proximo suo pauper odiosus erit, amici vero divitum multi.

²¹ Qui despicit proximum suum, peccat; qui autem miseretur pauperis, beatus erit.

²² Nonne errant, qui operantur malum? Misericordia et veritas iis, qui praeparant bona.

²³ In omni labore erit abundantia; verbum autem labiorum tendit tantummodo ad egestatem.

²⁴ Corona sapientium divitiae eorum, fatuitas stultorum fatuitas est.

²⁵ Liberat animas testis fidelis, et profert mendacia versipellis.

²⁶ In timore Domini fiducia fortis, et filiis eius erit spes. ²⁷ Timor Domini fons vitae, declinans a laqueis mortis.

²⁸ In multitudine populi dignitas regis, et in paucitate plebis ruina principis.

²⁹ Qui patiens est, multa gubernatur prudentia; qui autem impatiens est, exaltat stultitiam.

³⁰ Vita carnium sanitas cordis, putredo ossium invidia.

³¹ Qui calumniatur egentem, exprobrat Factori eius; honorat autem eum, qui miseretur pauperis.

³² In malitia sua impelletur impius, sperat autem iustus in integritate sua.

³³ In corde prudentis requiescit sapientia, at in medio stultorum agnoscetur?

³⁴ Iustitia elevat gentem, vituperium autem populorum est peccatum.

³⁵ Acceptus est regi minister intellegens, et iracundia ei, qui turpiter agit.