Read the Bible

¹ Factum est autem in die, qua complevit Moyses habitaculum et erexit illud unxitque et sanctificavit cum omnibus vasis suis, altare similiter et omnia vasa eius, ² obtulerunt principes Israel et capita familiarum, qui erant per singulas tribus praefecti eorum, qui numerati fuerant, ³ munera coram Domino sex plaustra tecta cum duodecim bobus. Unum plaustrum obtulere duo duces et unum bovem singuli; obtuleruntque ea in conspectu habitaculi. ⁴ Ait autem Dominus ad Moysen: ⁵ "Suscipe ab eis, ut serviant in ministerio tabernaculi conventus, et trades ea Levitis iuxta ordinem ministerii sui". ⁶ Itaque cum suscepisset Moyses plaustra et boves, tradidit eos Levitis. ⁷ Duo plaustra et quattuor boves dedit filiis Gerson, iuxta id quod habebant necessarium. ⁸ Quattuor alia plaustra et octo boves dedit filiis Merari, secundum offficia sua sub manu Ithamar filii Aaron sacerdotis. ⁹ Filiis autem Caath non dedit plaustra et boves, quia in sanctuario serviunt et onera propriis portant umeris.

¹⁰ Igitur obtulerunt duces in dedicationem altaris die, qua unctum est, oblationem suam ante altare. ¹¹ Dixitque Dominus ad Moysen: "Singuli duces per singulos dies offerant munera in dedicationem altaris". ¹² Primo die obtulit oblationem suam Naasson filius Aminadab de tribu Iudae. ¹³ Fueruntque in ea scutula argentea pondo centum triginta siclorum, phiala argentea habens septuaginta siclos iuxta pondus sanctuarii, utraque plena simila conspersa oleo in sacrificium, ¹⁴ acetabulum ex decem siclis aureis plenum incenso, ¹⁵ bos de armento et aries et agnus anniculus in holocaustum ¹⁶ hircusque pro peccato; ¹⁷ et in sacrificio pacificorum boves duo, arietes quinque, hirci quinque, agni anniculi quinque: haec est oblatio Naasson filii Aminadab. ¹⁸ Secundo die obtulit Nathanael filius Suar dux de tribu Issachar ¹⁹ scutulam argenteam appendentem centum triginta siclos, phialam argenteam habentem septuaginta siclos iuxta pondus sanctuarii, utramque plenam simila conspersa oleo in sacrificium, ²⁰ acetabulum aureum habens decem siclos plenum incenso, ²¹ bovem de armento et arietem et agnum anniculum in holocaustum ²² hircumque pro peccato; ²³ et in sacrificio pacificorum boves duos, arietes quinque, hircos quinque, agnos anniculos quinque: haec fuit oblatio Nathanael filii Suar. ²⁴ Tertio die princeps filiorum Zabulon Eliab filius Helon ²⁵ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ²⁶ acetabulum aureum appendens decem siclos plenum incenso, ²⁷ bovem de armento et arietem et agnum anniculum in holocaustum ²⁸ hircumque pro peccato; ²⁹ et in sacrificio pacificorum boves duos, arietes quinque, hircos quinque, agnos anniculos quinque: haec est oblatio Eliab filii Helon. ³⁰ Die quarto princeps filiorum Ruben Elisur filius Sedeur ³¹ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ³² acetabulum aureum appendens decem siclos plenum incenso, ³³ bovem de armento et arietem et agnum anniculum in holocaustum ³⁴ hircumque pro peccato; ³⁵ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Elisur filii Sedeur. ³⁶ Die quinto princeps filiorum Simeon Salamiel filius Surisaddai ³⁷ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ³⁸ acetabulum aureum appendens decem siclos plenum incenso, ³⁹ bovem de armento et arietem et agnum anniculum in holocaustum, ⁴⁰ hircumque pro peccato; ⁴¹ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Salamiel filii Surisaddai. ⁴² Die sexto princeps filiorum Gad Eliasaph filius Deuel ⁴³ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁴⁴ acetabulum aureum appendens decem siclos plenum incenso, ⁴⁵ bovem de armento et arietem et agnum anniculum in holocaustum, ⁴⁶ hircumque pro peccato; ⁴⁷ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Eliasaph filii Deuel. ⁴⁸ Die septimo princeps filiorum Ephraim Elisama filius Ammiud ⁴⁹ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁵⁰ acetabulum aureum appendens decem siclos plenum incenso, ⁵¹ bovem de armento et arietem et agnum anniculum in holocaustum, ⁵² hircumque pro peccato; ⁵³ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Elisama filii Ammiud. ⁵⁴ Die octavo princeps filiorum Manasse Gamaliel filius Phadassur ⁵⁵ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁵⁶ acetabulum aureum appendens decem siclos plenum incenso, ⁵⁷ bovem de armento et arietem et agnum anniculum in holocaustum ⁵⁸ hircumque pro peccato; ⁵⁹ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Gamaliel filii Phadassur. ⁶⁰ Die nono princeps filiorum Beniamin Abidan filius Gedeonis ⁶¹ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁶² et acetabulum aureum appendens decem siclos plenum incenso, ⁶³ bovem de armento et arietem et agnum anniculum in holocaustum ⁶⁴ hircumque pro peccato; ⁶⁵ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Abidan filii Gedeonis. ⁶⁶ Die decimo princeps filiorum Dan Ahiezer filius Ammisaddai ⁶⁷ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁶⁸ acetabulum aureum appendens decem siclos plenum incenso, ⁶⁹ bovem de armento et arietem et agnum anniculum in holocaustum ⁷⁰ hircumque pro peccato; ⁷¹ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Ahiezer filii Ammisaddai. ⁷² Die undecimo princeps filiorum Aser Phegiel filius Ochran ⁷³ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila conspersa oleo in sacrificium, ⁷⁴ acetabulum aureum appendens decem siclos plenum incenso, ⁷⁵ bovem de armento et arietem et agnum anniculum in holocaustum ⁷⁶ hircumque pro peccato; ⁷⁷ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Phegiel filii Ochran. ⁷⁸ Die duodecimo princeps filiorum Nephthali Ahira filius Enan ⁷⁹ obtulit scutulam argenteam appendentem centum triginta siclos, phialam argenteam habentem septuaginta siclos ad pondus sanctuarii, utramque plenam simila oleo conspersa in sacrificium, ⁸⁰ acetabulum aureum appendens decem siclos plenum incenso, ⁸¹ bovem de armento et arietem et agnum anniculum in holocaustum ⁸² hircumque pro peccato; ⁸³ et in hostias pacificorum boves duos, arietes quinque, hircos quinque, agnos anniculos quinque: haec fuit oblatio Ahira filii Enan. ⁸⁴ Haec in dedicatione altaris oblata sunt a principibus Israel in die, qua consecratum est: scutulae argenteae duodecim, phialae argenteae duodecim, acetabula duodecim, ⁸⁵ ita ut centum triginta siclos argenti haberet una scutella, et septuaginta siclos haberet una phiala, id est in commune vasorum omnium ex argento sicli duo milia quadringenti pondere sanctuarii; ⁸⁶ acetabula aurea duodecim plena incenso denos siclos appendentia pondere sanctuarii, id est simul auri sicli centum viginti; ⁸⁷ omnes boves de armento in holocaustum duodecim, arietes duodecim, agni anniculi duodecim et libamenta eorum; hirci duodecim pro peccato. ⁸⁸ In hostias pacificorum omnes boves viginti quattuor, arietes sexaginta, hirci sexaginta, agni anniculi sexaginta: haec oblata sunt in dedicatione altaris, quando unctum est. ⁸⁹ Cumque ingrederetur Moyses tabernaculum testimonii, ut consuleret oraculum, audiebat vocem loquentis ad se de propitiatorio, quod erat super arcam testimonii inter duos cherubim, unde et loquebatur ei.