Read the Bible

¹ Locutusque est Dominus ad Moysen dicens: ² "Praecipe filiis Israel, ut eiciant de castris omnem leprosum et qui semine fluit pollutusque est super mortuo. ³ Tam masculum quam feminam eicite de castris, ne contaminent ea, cum habitaverim cum eis". ⁴ Feceruntque ita filii Israel et eiecerunt eos extra castra, sicut locutus erat Dominus Moysi. ⁵ Locutusque est Dominus ad Moysen dicens: ⁶ "Loquere ad filios Israel: Vir sive mulier, cum fecerint ex omnibus peccatis, quae solent hominibus accidere, et fraude transgressi fuerint mandatum Domini, ille homo reus erit; ⁷ et confitebuntur peccatum suum et reddent ipsum caput quintamque partem desuper ei, in quem peccaverint. ⁸ Sin autem non fuerit qui recipiat, dabunt Domino, et erit sacerdotis, praeter arietem, qui offertur pro expiatione, ut sit placabilis hostia. ⁹ Omnis quoque praelibatio rerum sacrarum, quas offerunt filii Israel, ad sacerdotem pertinet; ¹⁰ et, quidquid in sanctuarium offertur a singulis et traditur manibus sacerdotis, ipsius erit".

¹¹ Locutusque est Dominus ad Moysen dicens: ¹² "Loquere ad filios Israel et dices ad eos: Vir, cuius uxor erraverit maritumque decipiens ¹³ dormierit cum altero viro, et hoc maritus deprehendere non quiverit, sed latet quod impuram se reddiderit et testibus argui non potest, quia non est inventa in stupro, ¹⁴ si spiritus zelotypiae concitaverit virum contra uxorem suam, quae vel polluta est vel falsa suspicione appetitur, ¹⁵ adducet eam ad sacerdotem et offeret oblationem pro illa decimam partem ephi farinae hordeaceae. Non fundet super eam oleum nec imponet tus, quia sacrificium zelotypiae est et oblatio investigans adulterium. ¹⁶ Afferet igitur eam sacerdos et statuet coram Domino; ¹⁷ assumetque aquam sanctam in vase fictili et pauxillum terrae de pavimento habitaculi mittet in eam. ¹⁸ Cumque posuerit sacerdos mulierem in conspectu Domini, discooperiet caput eius et ponet super manus illius sacrificium recordationis, oblationem zelotypiae; ipse autem tenebit aquas amarissimas, in quibus cum exsecratione maledicta congessit. ¹⁹ Adiurabitque eam et dicet: "Si non dormivit vir alienus tecum, et si non declinasti a viro tuo et non polluta es, deserto mariti toro, non te nocebunt aquae istae amarissimae, in quas maledicta congessi. ²⁰ Sin autem declinasti a viro tuo atque polluta es et concubuisti cum altero viro", ²¹ adiurabit eam sacerdos iuramento maledictionis: "Det te Dominus in maledictionem, iuramentum in medio populi tui; putrescere faciat femur tuum, et tumens uterus tuus disrumpatur; ²² ingrediantur aquae maledictae in ventrem tuum, et utero tumescente putrescat femur!". Et respondebit mulier: "Amen, amen". ²³ Scribetque sacerdos in libello ista maledicta et delebit ea aquis amarissimis ²⁴ et dabit ei bibere aquas amaras, in quas maledicta congessit, et ingredientur in eam aquae maledictionis, quae amarae fient; ²⁵ tollet sacerdos de manu eius sacrificium zelotypiae et agitabit illud coram Domino imponetque illud super altare; ²⁶ pugillum sacrificii tollat de eo, quod offertur in memoriale, et incendat super altare; et deinde potum det mulieri aquas amarissimas. ²⁷ Quas cum biberit, si polluta est et, contempto viro, adulterii rea, pertransibunt eam aquae maledictionis et, inflato ventre, computrescet femur; eritque mulier in maledictionem omni populo eius. ²⁸ Quod si polluta non fuerit sed munda, erit innoxia et faciet liberos". ²⁹ Ista est lex zelotypiae, si declinaverit mulier a viro suo et si polluta fuerit, ³⁰ maritusque zelotypiae spiritu concitatus adduxerit eam in conspectu Domini, et fecerit ei sacerdos iuxta omnia, quae scripta sunt; ³¹ maritus absque culpa erit, et illa recipiet iniquitatem suam.