Read the Bible

¹ Dixitque Balaam ad Balac: "Aedifica mihi hic septem aras et para totidem vitulos eiusdemque numeri arietes". ² Cumque fecisset iuxta sermonem Balaam, imposuerunt vitulum et arietem super aram. ³ Dixitque Balaam ad Balac: "Sta paulisper iuxta holocaustum tuum, donec vadam, si forte occurrat mihi Dominus; et, quodcumque imperaverit, loquar tibi". Cumque abiisset in collem nudum, ⁴ occurrit illi Deus. Locutusque ad eum Balaam: "Septem, inquit, aras erexi et imposui vitulum et arietem desuper". ⁵ Dominus autem posuit verbum in ore eius et ait: "Revertere ad Balac et haec loqueris". ⁶ Reversus invenit stantem Balac iuxta holocaustum suum et omnes principes Moabitarum; ⁷ assumptaque parabola sua, dixit: "De Aram adduxit me Balac, rex Moabitarum de montibus orientis: "Veni, inquit, et maledic pro me Iacob; propera et detestare Israel!". ⁸ Quomodo maledicam, cui non maledixit Deus? Qua ratione detester, quem Dominus non detestatur? ⁹ De summis silicibus video eum et de collibus considero illum: populus solus habitabit et inter gentes non reputabitur. ¹⁰ Et quis dinumerare possit pulverem Iacob et quis numeravit arenam Israel? Moriatur anima mea morte iustorum, et fiant novissima mea horum similia". ¹¹ Dixitque Balac ad Balaam: "Quid est hoc, quod agis? Ut malediceres inimicis meis, vocavi te, et tu e contrario benedicis eis!". ¹² Cui ille respondit: "Num aliud possum loqui, nisi quod iusserit Dominus?".

¹³ Dixit ergo Balac: "Veni mecum in alterum locum, unde partem Israel videas et totum videre non possis; inde maledicito ei". ¹⁴ Cumque duxisset eum in campum speculatorum super verticem montis Phasga, aedificavit septem aras imposuitque supra vitulum atque arietem. ¹⁵ Et dixit Balaam ad Balac: "Sta hic iuxta holocaustum tuum, donec ego obvius pergam". ¹⁶ Cui cum Dominus occurrisset posuissetque verbum in ore eius, ait: "Revertere ad Balac et haec loqueris ei". ¹⁷ Reversus invenit eum stantem iuxta holocaustum suum et principes Moabitarum cum eo. Ad quem Balac: "Quid, inquit, locutus est Dominus?". ¹⁸ At ille, assumpta parabola sua, ait: "Surge, Balac, et ausculta; audi, fili Sephor. ¹⁹ Non est Deus quasi homo, ut mentiatur, nec ut filius hominis, ut mutetur. Numquid dixit et non faciet? Locutus est et non implebit? ²⁰ Ad benedicendum adductus sum, benedictionem prohibere non valeo. ²¹ Non conspicitur malum in Iacob, nec videtur calamitas in Israel. Dominus Deus eius cum eo est, et clangor regis in illo. ²² Deus eduxit illum de Aegypto, sicut cornua bubali est ei. ²³ Non est augurium in Iacob, nec divinatio in Israel. Temporibus suis dicetur Iacob et Israeli quid operatus sit Deus. ²⁴ Ecce populus ut leaena consurget, et quasi leo erigetur; non accubabit, donec devoret praedam et occisorum sanguinem bibat". ²⁵ Dixitque Balac ad Balaam: "Nec maledicas ei, nec benedicas!". ²⁶ Et ille ait: "Nonne dixi tibi quod, quidquid mihi Dominus imperaret, hoc facerem?". ²⁷ Et ait Balac ad eum: "Veni, et ducam te ad alum locum, si forte placeat Deo, ut inde maledicas ei". ²⁸ Cumque duxisset eum super verticem montis Phegor, qui respicit solitudinem, ²⁹ dixit ei Balaam: "Aedifica mihi hic septem aras et para totidem vitulos eiusdemque numeri arietes". ³⁰ Fecit Balac, ut Balaam dixerat, imposuitque vitulos et arietes per singulas aras.