Read the Bible

¹ Tunc Iesus ductus est in de sertum a Spiritu, ut tentaretur a Diabolo. ² Et cum ieiunasset quadraginta diebus et quadraginta noctibus, postea esuriit. ³ Et accedens tentator dixit ei: "Si Filius Dei es, dic, ut lapides isti panes fiant". ⁴ Qui respondens dixit: "Scriptum est: "Non in pane solo vivet homo, sed in omni verbo, quod procedit de ore Dei"". ⁵ Tunc assumit eum Diabolus in sanctam civitatem et statuit eum supra pinnaculum templi ⁶ et dicit ei: "Si Filius Dei es, mitte te deorsum. Scriptum est enim: "Angelis suis mandabit de te, et in manibus tollent te, ne forte offendas ad lapidem pedem tuum"". ⁷ Ait illi Iesus: "Rursum scriptum est: "Non tentabis Dominum Deum tuum"". ⁸ Iterum assumit eum Diabolus in montem excelsum valde et ostendit ei omnia regna mundi et gloriam eorum ⁹ et dicit illi: "Haec tibi omnia dabo, si cadens adoraveris me". ¹⁰ Tunc dicit ei Iesus: "Vade, Satanas! Scriptum est enim: "Dominum Deum tuum adorabis et illi soli servies"". ¹¹ Tunc reliquit eum Diabolus, et ecce angeli accesserunt et ministrabant ei.

¹² Cum autem audisset quod Ioannes traditus esset, secessit in Galilaeam. ¹³ Et relicta Nazareth, venit et habitavit in Capharnaum maritimam ¹⁴ in finibus Zabulon et Nephthali, ut impleretur, quod dictum est per Isaiam prophetam dicentem: ¹⁵ "Terra Zabulon et terra Nephthali, ad viam maris, trans Iordanem, Galilaea gentium; ¹⁶ populus, qui sedebat in tenebris, lucem vidit magnam, et sedentibus in regione et umbra mortis lux orta est eis". ¹⁷ Exinde coepit Iesus praedicare et dicere: "Paenitentiam agite; appropinquavit enim regnum caelorum".

¹⁸ Ambulans autem iuxta mare Galilaeae, vidit duos fratres, Simonem, qui vocatur Petrus, et Andream fratrem eius, mittentes rete in mare; erant enim piscatores. ¹⁹ Et ait illis: "Venite post me, et faciam vos piscatores hominum". ²⁰ At illi continuo, relictis retibus, secuti sunt eum. ²¹ Et procedens inde vidit alios duos fratres, Iacobum Zebedaei et Ioannem fratrem eius, in navi cum Zebedaeo patre eorum reficientes retia sua; et vocavit eos. ²² Illi autem statim, relicta navi et patre suo, secuti sunt eum.

²³ Et circumibat Iesus totam Galilaeam, docens in synagogis eorum et praedicans evangelium regni et sanans omnem languorem et omnem infirmitatem in populo. ²⁴ Et abiit opinio eius in totam Syriam; et obtulerunt ei omnes male habentes, variis languoribus et tormentis comprehensos, et qui daemonia habebant, et lunaticos et paralyticos, et curavit eos. ²⁵ Et secutae sunt eum turbae multae de Galilaea et Decapoli et Hierosolymis et Iudaea et de trans Iordanem.