Read the Bible

¹ Locutus est Dominus ad Moysen et Aaron dicens: ² "Dicite filiis Israel: Haec sunt animalia, quae comedere debetis de cunctis animantibus terrae. ³ Omne, quod habet plene divisam ungulam et ruminat in pecoribus, comedetis. ⁴ Haec autem non comedetis ex ruminantibus vel dividentibus ungulam: camelum, quia ruminat quidem, sed non dividit ungulam, inter immunda reputabis; ⁵ hyracem, qui ruminat ungulamque non dividit, immundus est; ⁶ leporem quoque, nam et ipse ruminat, sed ungulam non dividit; ⁷ et suem, qui, cum ungulam plene dividat, non ruminat. ⁸ Horum carnibus non vescemini nec cadavera contingetis, quia immunda sunt vobis.

⁹ Haec sunt, quae gignuntur in aquis et vesci licitum est: omne, quod habet pinnulas et squamas, tam in mari quam in fluminibus et torrentibus, comedetis. ¹⁰ Quidquid autem pinnulas et squamas non habet, reptilium vel quorumlibet aliorum animalium, quae in aquis moventur, abominabile vobis ¹¹ et execrandum erit; carnes eorum non comedetis et morticina vitabitis. ¹² Cuncta, quae non habent pinnulas et squamas in aquis, polluta erunt vobis. ¹³ Haec sunt, quae de avibus comedere non debetis, et vitanda sunt vobis: aquilam et grypem et haliaeetum, ¹⁴ milvum ac vulturem iuxta genus suum ¹⁵ et omne corvini generis, ¹⁶ struthionem et noctuam et larum et accipitrem iuxta genus suum, ¹⁷ bubonem et mergulum et ibin, ¹⁸ cycnum et nyctocoracem et porphyrionem, ¹⁹ erodionem et charadrion iuxta genus suum, upupam quoque et vespertilionem.

²⁰ Omne de volucribus, quod reptat super quattuor pedes, abominabile erit vobis. ²¹ Quidquid autem ambulat quidem super quattuor pedes, sed habet longiora retro crura, per quae salit super terram, ²² comedere debetis; ut est bruchus in genere suo et attacus atque ophiomachus ac locusta, singula iuxta genus suum. ²³ Quidquid autem ex volucribus reptantibus quattuor tantum habet pedes, execrabile erit vobis. ²⁴ Et quicumque morticina eorum tetigerit, polluetur et erit immundus usque ad vesperum. ²⁵ Et si necesse fuerit, ut portet quippiam horum mortuum, lavabit vestimenta sua et immundus erit usque ad solis occasum. ²⁶ Omne animal, quod habet quidem ungulam, sed non dividit eam nec ruminat, immundum erit vobis; et, qui tetigerit illud, contaminabitur. ²⁷ Quod ambulat super plantas pedum ex cunctis animantibus, quae incedunt quadrupedia, immundum erit; qui tetigerit morticina eorum, polluetur usque ad vesperum. ²⁸ Et, qui portaverit huiuscemodi cadavera, lavabit vestimenta sua et immundus erit usque ad vesperum; quia omnia haec immunda sunt vobis. ²⁹ Haec quoque inter polluta reputabuntur de his, quae reptant in terra: mustela et mus et lacerta iuxta genus suum, ³⁰ mygale et testudo et stellio et talpa et chamaeleon: ³¹ omnia haec immunda sunt. Qui tetigerit morticina eorum, immundus erit usque ad vesperum; ³² et super quod ceciderit quidquam de morticinis eorum, polluetur tam vas ligneum et vestimentum quam pelles et cilicia, et in quocumque fit opus; tinguentur aqua et polluta erunt usque ad vesperum et postea munda. ³³ Vas autem fictile, in quo horum quidquam intro ceciderit, polluetur et frangendum est. ³⁴ Omnis cibus, quem comedetis, si fusa fuerit exinde super eum aqua, immundus erit; et omne liquens, quod bibitur de tali vase, immundum erit. ³⁵ Et quidquid de morticinis istiusmodi ceciderit super illud, immundum erit; sive clibani sive chytropodes destruentur: immundi sunt et immundi erunt vobis. ³⁶ Fontes tamen et cisternae et omnis aquarum congregatio munda erit. Qui vero morticinum eorum tetigerit, polluetur. ³⁷ Si ceciderint super sementem, non polluent eam; ³⁸ sin autem quispiam aqua sementem perfuderit, et postea morticinis tacta fuerit, immunda erit vobis. ³⁹ Si mortuum fuerit animal, quod licet vobis comedere, qui cadaver eius tetigerit, immundus erit usque ad vesperum; ⁴⁰ et, qui comederit ex eo quippiam sive portaverit cadaver eius, lavabit vestimenta sua et immundus erit usque ad vesperum. ⁴¹ Omne, quod reptat super terram, abominabile erit nec assumetur in cibum. ⁴² Quidquid super pectus et quidquid quadrupes graditur, vel multos habet pedes sive per humum trahitur, non comedetis, quia abominabile est.

⁴³ Nolite contaminare animas vestras nec tangatis quidquam eorum, ne immundi sitis. ⁴⁴ Ego enim sum Dominus Deus vester; sanctificamini et sancti estote, quoniam et ego sanctus sum. Ne polluatis animas vestras in omni reptili, quod movetur super terram. ⁴⁵ Ego enim sum Dominus, qui eduxi vos de terra Aegypti, ut essem vobis in Deum: sancti eritis, quia et ego sanctus sum. ⁴⁶ Ista est lex animantium et volucrum et omnis animae viventis, quae movetur in aqua et reptat in terra, ⁴⁷ ut differentias noveritis mundi et immundi, et sciatis quid comedere et quid respuere debeatis".